ដោយ: គង់ លាងហួរ
អន្តរជាតិ: អាជ្ញាធរអភិវឌ្ឍន៍ទីក្រុង (URA)របស់ប្រទេសសិង្ហបុរី បានអនុម័ត ឱ្យក្រុមហ៊ុនសណ្ឋាគារ Marina Bay Sands (MBS) សាងសង់អគារប៉មទី៤ ដែលមានបន្ទប់សណ្ឋាគារជាច្រើនបន្ទប់។
យោងតាមទិន្នន័យរបស់អាជ្ញាធរអភិវឌ្ឍន៍ទីក្រុង (URA) បានបង្ហាញថា អគារថ្មីនេះនឹងមានសណ្ឋាគារ នឹងមានទំហំ១៥៣.១០០ម៉ែត្រការ៉េ ជាមួយនឹងបន្ទប់ចំនួន៥៨៧ និងកន្លែងលក់រាយទំហំ១២.១៨៥ម៉ែត្រការ៉េ។
យោងតាមផែនការពង្រីកសណ្ឋាគារ ដែលបានដាក់បង្ហាញនៅក្នុងឆ្នាំ២០១៩ អគារប៉មទី៤នេះ ត្រូវបានគេរំពឹងថា នឹងមានបន្ទប់សណ្ឋាគារចំនួន១.០០០បន្ទប់ មជ្ឈមណ្ឌលកម្សាន្តចំនួន១៥.០០០កៅអី និងដំបូលដែលមានអាងហែលទឹក និងភោជនីយដ្ឋាន។ អគារនេះក៏ត្រូវបានគេរំពឹងថា នឹងមានសាលប្រជុំ សាលតាំងពិពណ៌ និងហាងលក់រាយប្រណីតផងដែរ។
ទោះជាយ៉ាងនេះក្តី MBS បានបដិសេធមិនផ្តល់ព័ត៌មានបន្ថែមទេ នៅពេលដែលត្រូវបានសាកសួរ អំពីការកាត់បន្ថយចំនួនបន្ទប់សណ្ឋាគារពី១.០០០បន្ទប់ ដែលបានប្រកាសពីមុន មកនៅត្រឹម៥៨៧បន្ទប់ នាពេលនេះ។
គម្រោងអគារប៉មទី៤នេះ គ្រោងនឹងចំណាយថវិកាសាងសង់អស់ប្រមាណ៣,៣ពាន់លានដុល្លារអាមេរិក ប៉ុន្តែផែនការពង្រីកសណ្ឋាគារនេះ ត្រូវបានផ្អាកទៅវិញ ដោយសារបញ្ហាជំងឺរាតត្បាតកូវីដ-១៩ កាលពីពេលកន្លងទៅ។
កាលបរិច្ឆេទបញ្ចប់ការសាងសង់ គម្រោងត្រូវបានពន្យារជាលើកដំបូងបង្អស់ ពីឆ្នាំ២០២៥ ដល់ឆ្នាំ២០២៦ ប៉ុន្តែក្រោយមកក្រុមហ៊ុន Las Vegas Sands ដែលជាក្រុមហ៊ុនមេរបស់សណ្ឋាគារ Marina Bay Sands បានអះអាងថា ការងារគម្រោងនេះមិនអាចចាប់ផ្តើមនៅខែមេសា ឆ្នាំ២០២៣ ដូចដែលបានគ្រោងទុកនៅពេលនោះទេ។
ប៉ុន្តែនៅពេលនេះវិញ អាជ្ញាធរអភិវឌ្ឍន៍ទីក្រុង បានអនុញ្ញាតឱ្យសណ្ឋាគារ MBS អាចចាប់ផ្តើមការងារសាងសង់ នៅខែមេសា ឆ្នាំ២០២៤នេះ។ ចំណែក កាលបរិច្ឆេទថ្ងៃបញ្ចប់ការសាងសង់ ក៏ត្រូវបានពន្យារពេលរហូតដល់ថ្ងៃទី៨ ខែមេសា ឆ្នាំ២០២៨៕
