ដោយ: គង់ លាងហួរ
បាងកក: រដ្ឋាភិបាលថៃបានប្រកាសដាក់ចេញគោលដៅ ដើម្បីស្តារឡើងវិញនូវពាណិជ្ជកម្មឆ្លងព្រំដែន ជាមួយប្រទេសជិតខាង រួមទាំងកម្ពុជា នៅឆ្នាំ២០២៤នេះ បន្ទាប់ទំហំពាណិជ្ជកម្មមានការថយចុះកាលពីឆ្នាំមុន។ នេះបើយោងតាមការចុះផ្សាយពីសារពត៌មាន Bangkok Post។
លោក Ronnarong Phoolpipat អគ្គនាយកនៃនាយកដ្ឋានពាណិជ្ជកម្មបរទេស បានអះអាងថា “ដើម្បីសម្រេចបាននូវគោលដៅនេះ ក្រសួងពាណិជ្ជកម្មប្តេជ្ញាពន្លឿនការដោះដូរពាណិជ្ជកម្មឆ្លងកាត់ព្រំដែន ក្រោមយុទ្ធសាស្ត្រជំរុញការវិនិយោគរបស់រដ្ឋាភិបាលសម្រាប់ឆ្នាំ២០២៤ដល់ឆ្នាំ២០២៧”។
វិធានការទាំងនោះរួមមាន ការធ្វើកិច្ចសហប្រតិបត្តិការជាមួយទីភ្នាក់ងាររដ្ឋពាក់ព័ន្ធនានា ដើម្បីជួយសម្រួល និងជំរុញពាណិជ្ជកម្មឆ្លងព្រំដែន ដូចជាការបង្កើតមជ្ឈមណ្ឌលសេវាច្រកចេញចូលតែមួយ (OSS) និងការភ្ជាប់ឯកសារនាំចេញ-នាំចូលតាមរយៈប្រព័ន្ធ National Single Window ដើម្បីសម្រួលដំណើរការពាណិជ្ជកម្ម។
កាលពីឆ្នាំ២០២៣កន្លងទៅ ក្រសួងបានបើកមជ្ឈមណ្ឌលសេវាច្រកចេញចូលតែមួយ (OSS) នៅក្នុងខេត្តចំនួន៨ រួមមាន ខេត្ត Chiang Rai ខេត្ត Tak ខេត្ត Trat ខេត្ត Songkhla ខេត្ត Nong Khai ខេត្ត Nakhon Phanom ខេត្ត Mukdahan និងខេត្ត Udon Thani។
ទំហំពាណិជ្ជកម្មឆ្លងព្រំដែនរវាងថៃ ជាមួយបណ្តាប្រទេសជិតខាងចំនួន៤ បានកើនឡើងដល់៩៣០ពាន់លានបាតក្នុងឆ្នាំ២០២៣ ដែលក្នុងនោះ ការនាំចេញរបស់ថៃមានទំហំទឹកប្រាក់់ចំនួន៥៨០ពាន់លានបាត ខណៈការនាំចូលមានទំហំទឹកប្រាក់់ចំនួន៣៥០ពាន់លានបាត។
ប្រទេសម៉ាឡេស៊ីគឺជាដៃគូពាណិជ្ជកម្មកំពូលទី១ ដែលមានទឹកប្រាក់់ចំនួន២៨៧ពាន់លានបាត បន្ទាប់មកគឺប្រទេសឡាវ ដែលមានទឹកប្រាក់ចំនួន២៦១ពាន់លានបាត មីយ៉ាន់ម៉ាមានចំនួន២២០ពាន់លាន និងប្រទេសកម្ពុជាមានចំនួន១៦២ពាន់លានបាត។
ចំណែកឯ ផលិតផលនាំចេញសំខាន់ៗរបស់ប្រទេសថៃ រួមមាន ប្រេងម៉ាស៊ូត ប្រេងចម្រាញ់ កុំព្យូទ័រ និងគ្រឿងបន្លាស់៕
