ដោយៈ គង់ ហ្វីអូណា
ភ្នំពេញៈ មន្ត្រីក្រសួងទេសចរណ៍ និងតំណាងក្រុមហ៊ុន Royal Caribbean Group របស់សហរដ្ឋអាមេរិក បានពិភាក្សាលើកិច្ចសហប្រតិបត្តិការជំរុញអភិវឌ្ឍវិស័យទេសចរណ៍។
កិច្ចសហប្រតិបត្តិការនេះ ធ្វើឡើងតាមរយៈកប៉ាល់ទេសចរណ៍(Cruise Tourism) ជាពិសេសការនាំយកកប៉ាល់ទេសចរណ៍របស់ក្រុមហ៊ុននេះមកទស្សនា និងចូលចតនៅខេត្តព្រះសីហនុ។
កិច្ចពិភាក្សានេះ ធ្វើឡើងនៅជំនួបរវាង លោក ជួប រតនា ប្រធាននាយកដ្ឋានផែនការអភិវឌ្ឍទេសចរណ៍ និងលោកJoni Gevriye តំណាងក្រុមហ៊ុន Royal Caribbean Group កាលពីថ្ងៃទី ២ ខែកុម្ភៈ ឆ្នាំ ២០២៤។
លោក ជួប រតនា បានបង្ហោះខ្លឹមសារនៃជំនួបនេះនៅលើបណ្តាញសង្គមហ្វេសប៊ុកថា កិច្ចប្រជុំបានឯកភាពលើនីតិវិធីបន្ទាប់ ដើម្បីចុះត្រួតពិនិត្យទីតាំងចូលចតជាក់ស្តែង និងរៀបចំកិច្ចប្រជុំជាមួយភាគីពាក់ព័ន្ធ ដើម្បីប្រមូលធាតុចូលសំខាន់ៗ សម្រាប់ធ្វើជារបាយការណ៍សង្ខេបពីលក្ខណៈបច្ចេកទេស និងសេវាកម្ម ដើម្បីឱ្យការិយាល័យកណ្តាលរបស់ក្រុមហ៊ុន Royal Caribbean Group ត្រួតពិនិត្យ មុននឹងសម្រេចដាក់ខេត្តព្រះសីហនុ ចូលទៅក្នុងកញ្ចប់ធ្វើដំណើរទេសចរណ៍របស់ក្រុមហ៊ុននៅពេលខាងមុខ។
តំណាងក្រុមហ៊ុន Royal Caribbean Group បានលើកឡើងពីចំណុចគន្លឹះសំខាន់ៗ ដែលត្រូវសិក្សាដើម្បីបង្កលក្ខណៈដល់ការចូលចតនៅខេត្តព្រះសីហនុ និងការទាក់ទាញកញ្ចប់ទេសចរណ៍រួមមាន ទី១ ពិនិត្យលក្ខណៈបច្ចេកទេសផែចូលចត កប៉ាល់ទេសចរណ៍ ទី២បែបបទអន្តោប្រវេសន៍ សម្រាប់ទេសចរចូលទស្សនា ខេត្តព្រះសីហនុ និងការតភ្ជាប់កញ្ចប់ទស្សនាទៅគោលដៅនានា។
ទី៣ បែបបទគយសម្រាប់ត្រួតពិនិត្យ អំឡុងពេលចូលចត និងទី៤ទំនាក់ទំនងជាមួយទីភ្នាក់ងារ សម្របសម្រួលកំពង់ផែ (Port Agents) និងទីភ្នាក់ងារទេសចរណ៍ សម្រាប់លក់កញ្ចប់ទស្សនាខេត្តព្រះសីហនុ ឬគោលដៅតភ្ជាប់នានា។
លោក ជួប រតនា ក្រុមហ៊ុន Royal Caribbean Group ជាក្រុមហ៊ុនយក្សលំដាប់ទីពីរ លើពិភពលោកខាងវិស័យកប៉ាល់ ទេសចរណ៍ និងបានដំណើរការទេសចរតាមកប៉ាល់ នៅទូទាំងពិភពលោកតាមរយៈកប៉ាល់ទេសចរសរុបចំនួន២៨កប៉ាល់។
លោករំពឹងទុកថា ការភ្ជាប់ទំនាក់ទំនង ជាមួយក្រុមហ៊ុនខាងលើ នឹងនាំភ្ញៀវទេសចរជុំវិញពិភពលោក មកទស្សនាខេត្តព្រះសីហនុ និងទទួលយកបទពិសោធន៍ថ្មី ពីគោលដៅតារារះនាទិសនិរតី ខណៈរដ្ឋាភិបាល កំពុងខិតខំអភិវឌ្ឍខេត្តព្រះសីហនុ ឱ្យប្រែក្លាយទៅជាតំបន់សេដ្ឋកិច្ចពិសេសគំរូពហុបំណងនៅពេលខាងមុខ៕