ដោយៈ គង់ សូរិយា
ភ្នំពេញៈ ទំនាក់ទំនងល្អរវាងរដ្ឋាភិបាល ប្រទេសទាំងពីរ ស្របពេលកម្រិតទំនាក់ទំនង បានឈានដល់ភាពជាដៃគូយុទ្ឋសាស្រ្តគ្រប់ជ្រុងជ្រោយ កម្ពុជាបាននិងកំពុងពង្រីកឱកាស ទាក់ទាញការវិនិយោគពីជប៉ុនមកកាន់កម្ពុជាកាន់តែច្រើន។
រដ្ឋាភិបាលក្រោមការដឹកនាំរបស់សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា និងផ្នែកឯកជនកំពុងខិតខំផ្សព្វផ្សាយពីសក្តានុពលដែលខ្លួនមានទាំងកត្តាភូមិសាស្ត្រ ច្បាប់វិនិយោគ កម្លាំងពលកម្ម និងទីផ្សារនាំចេញទំនិញជាដើម។
សម្តេចធិបតីហ៊ុន ម៉ាណែត ក្នុងដំណើរទស្សនកិច្ចទៅប្រទេសជប៉ុន កាលពីខែធ្នូ ឆ្នាំ ២០២៣ ដើម្បីចូលរួមកិច្ចប្រជុំកំពូលរំឭកខួបអនុស្សាវរីយ៍អាស៊ាន-ជប៉ុន ឆ្នាំទី៥០ នៃមិត្តភាព និងកិច្ចសហប្រតិបត្តិការអាស៊ាន-ជប៉ុន ក៏បានចូលរួមនៅក្នុងសិក្ខាសាលា វិនិយោគកម្ពុជាឆ្នាំ ២០២៣ ដោយបានជួបផ្ទាល់ជាមួយនឹងវិនិយោគិនជប៉ុន ដើម្បីធ្វើការផ្សព្វផ្សាយ និងទាក់ទាញពួកគេឱ្យចូលមក បណ្តាក់ទុននៅកម្ពុជាកាន់តែច្រើន រួមទាំងផែនការក្នុងការបង្កើត តំបន់តំបន់សេដ្ឋកិច្ចពិសេសកម្ពុជា-ជប៉ុនផងដែរ។
ជាការឆ្លើយទៅនឹងសំណើរបស់រដ្ឋាភិបាល និងផ្នែកឯកជនកម្ពុជា លោក Yoshihisa Suzuki ប្រធានគណៈកម្មាធិការកិច្ចសហប្រតិបត្តិការធុរកិច្ចមេគង្គ-ជប៉ុន នៃសភាពាណិជ្ជកម្ម និងឧស្សាហកម្មជប៉ុន កាលពីចុងសប្តាហ៍កន្លងមក បានជួបពិភាក្សាជាមួយសម្តេចធិបតីហ៊ុន ម៉ាណែត មុនបន្តជួបពិភាក្សាជាមួយថ្នាក់ដឹកនាំ នៃសភាពាណិជ្ជកម្មកម្ពុជា (CCC) ដែលដឹកនាំដោយអ្នកឧកញ៉ាគិត ម៉េង ប្រធានសភាពាណិជ្ជកម្មកម្ពុជា។
កម្ពុជាសង្ឃឹមថា ទទួលបានការវិនិយោគពីក្រុមហ៊ុនជប៉ុនកាន់តែច្រើន
អនុប្រធានសភាពាណិជ្ជកម្មកម្ពុជា អ្នក លឹម ហេង ដែលចូលរួមក្នុងជំនួបទ្វេភាគី រវាងថ្នាក់ដឹកនាំសភាពាណិជ្ជកម្មកម្ពុជា ជាមួយគណៈប្រតិភូជប៉ុន នៅក្នុងតំបន់សេដ្ឋកិច្ចពិសេសរ៉ូយ៉ាល់ គ្រុប កាលពីថ្ងៃទី ២ ខែកុម្ភៈ។
អ្នកឧកញ៉ាបានមានប្រសាសន៍ថា ជំនួបរវាងផ្នែកឯកជនកម្ពុជា-ជប៉ុន គឺជាការឆ្លើយតបជាវិជ្ជមាន នឹងការអំពាវនាវរបស់ថ្នាក់ដឹកនាំកម្ពុជានាជំនួបជាមួយវិនិយោគិនជប៉ុន កាលពីអំឡុងខែធ្នូ ឆ្នាំមុន។
អ្នកឧកញ៉ាបានបន្តថា “ជំនួបនេះគឺមានសារៈសំខាន់ និងអត្ថន័យធំធេងសម្រាប់ផ្សព្វផ្សាយ និងទាក់ទាញអ្នកវិនិយោគជប៉ុន ឱ្យចូលមកវិនិយោគផ្ទាល់នៅកម្ពុជាកាន់តែច្រើន និងបង្កើនចំណងទាក់ទងផ្នែកទីផ្សារឱ្យកាន់តែធំ”។
អ្នកឧកញ៉ាបន្ថែមថា “បន្ទាប់ពីដំណើរទស្សនកិច្ច របស់ថ្នាក់ដឹកនាំសភាពាណិជ្ជកម្ម និងឧស្សាហកម្មជប៉ុននេះ ខ្ញុំមានសុទិដ្ឋិនិយមថា កម្ពុជានឹងទទួលបានការវិវឌ្ឍ ជាវិជ្ជមានថ្មីៗបន្ថែមកាន់តែច្រើនពីវិនិយោគិនជប៉ុន”។
អ្នកឧកញ៉ាលឹម ហេងបានសម្តែងសុទិដ្ឋិនិយមថា អ្វីដែលគួរចាប់អារម្មណ៍ខ្លាំង ក្នុងជំនួបរវាងCCC ជាមួយភាគីជប៉ុន គឺវត្តមានក្រុមហ៊ុនអាកាសចរណ៍ជប៉ុនJapan Airlines ខណៈកន្លងមកការហោះហើរត្រង់រវាងកម្ពុជា-ជប៉ុន គឺមានតែក្រុមហ៊ុនអាកាសចរណ៍ជប៉ុន ANA ប៉ុណ្ណោះ។
ការវិនិយោគរបស់ជប៉ុននៅកម្ពុជាពេលនេះ គឺមានគម្រោងធំៗច្រើន ដូចជា ក្រុមហ៊ុន Minebea (Cambodia), រោងចក្រផលិតគ្រឿងម៉ាស៊ីន និងម៉ូទ័រ រោងចក្រដំឡើងរថយន្ត,ផ្សារ Aeon Mall វិស័យកសិកម្ម និងតំបន់សេដ្ឋកិច្ចពិសេស ជាដើម។
នៅក្នុងជំនួបជាមួយនាយករដ្ឋមន្ត្រីកម្ពុជា សម្តេចធិបតីហ៊ុន ម៉ាណែត កាលពីថ្ងៃទី ១ ខែកម្ភៈ លោក Yoshihisa Suzuki បានឱ្យដឹងថា បច្ចុប្បន្នសភាពាណិជ្ជកម្ម និងឧស្សាហកម្មជប៉ុន គឺជាស្ថាប័នសេដ្ឋកិច្ច និងពាណិជ្ជកម្មដ៏ធំមួយនៅប្រទេសជប៉ុន ដោយមានការិយាល័យចំនួន៥១៥ ទីតាំង និងមានសមាជិកជាង១,២៥ លាននាក់ ដែលផ្តោតភាគច្រើន លើវិស័យវាយនភណ្ឌ គ្រឿងម៉ាស៊ីន លោហធាតុ ថាមពល សារធាតុគីមី អាហារ លំនៅឋាន បច្ចេកវិទ្យា និងហិរញ្ញវត្ថុ។
គម្រោងបង្កើតតំបន់សេដ្ឋកិច្ច គឺដើម្បីទាក់ទាញវិនិយោគិនជប៉ុន
ប្រធានសមាគមអចលនទ្រព្យសកល លោកឧកញ៉ាសំ សុខនឿន ដែលកំពុងសិក្សាលទ្ធភាពចាប់ដៃគូ ជាមួយវិនិយោគិនជប៉ុន លើគម្រោងបង្កើត តំបន់សេដ្ឋកិច្ចពិសេសកម្ពុជា-ជប៉ុន បាននិយាយថា នៅពេលមានការវិនិយោគ លើតំបន់សេដ្ឋកិច្ចពិសេសពីសំណាក់វិនិយោគិនជប៉ុន គឺពិតណាស់វានឹងជួយទាក់ទាញ វិនិយោគិនជប៉ុនឱ្យមកវិនិយោគនៅកម្ពុជាកាន់តែច្រើន។
ជាក់ស្តែងដោយសារបច្ចុប្បន្ន តំបន់សេដ្ឋកិច្ចពិសេសនៅកម្ពុជាមានម្ចាស់ភាគច្រើន ជាជនជាតិចិន ដូច្នេះវិនិយោគិនចិននៅកម្ពុជាក៏មានជាងគេច្រើនដែរ។
លោកឧកញ៉ាបានបញ្ជាក់ថា “វិនិយោគិនជប៉ុនភាគច្រើន ត្រូវបានគេទទួលស្គាល់ថា ជាវិនិយោគិនមានសក្តានុពល និងមានភាពច្បាស់លាស់ ដូច្នេះបើកម្ពុជាមានតំបន់សេដ្ឋកិច្ច ដែលមានម្ចាស់ជាវិនិយោគិនជប៉ុន គឺប្រាកដជាមានឱកាសច្រើន ក្នុងការទាក់ទាញក្រុមហ៊ុនជប៉ុនឱ្យចូលមកបណ្តាក់ទុន។
លោកបន្ថែមថា ទន្ទឹមនឹងការសិក្សាទីតាំង បង្កើតតំបន់សេដ្ឋកិច្ចនេះ លោកក៏កំពុងសិក្សាស៊ីជម្រៅ ជាមួយអ្នកវិនិយោគជប៉ុន ដើម្បីស្វែងរកក្រុមហ៊ុន ដែលមានលទ្ធភាពកៀរគរ ក្រុមហ៊ុនជប៉ុនដទៃទៀតឱ្យមកបើករោងចក្រ/ សហគ្រាសក្នុងតំបន់សេដ្ឋកិច្ច ពិសេសកម្ពុជា-ជប៉ុន ដែលអាចលេចវត្តមាននាពេលខាងមុខ។
លោកបន្ថែមថា “បើសិនក្រុមហ៊ុនជប៉ុនល្បីៗ មកបើករោងចក្រផ្ទាល់នៅកម្ពុជា គឺវានឹងជួយឱ្យគុណភាពផលិតផល ប្រើប្រាស់នៅកម្ពុជាកាន់តែល្អ ហើយក៏ជួយលើកកម្ពស់សមត្ថភាព នាំចេញទំនិញកម្ពុជាទៅទីផ្សារអន្តរជាតិផងដែរ”។
នៅក្នុងបំណងទាក់ទាញវិនិយោគិនជប៉ុន ឱ្យមកវិនិយោគនៅកម្ពុជាកាន់តែច្រើន លោកឧបនាយករដ្ឋមន្រ្តី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ២៥ ធ្នូ ឆ្នាំ ២០២៣ បានដឹកនាំកិច្ចប្រជុំអន្តរក្រសួង ជាមួយនឹងគណៈប្រតិភូនៃប្រទេសជប៉ុន ដែលដឹកនាំដោយ លោក UENO Atsushi ឯកអគ្គរាជទូតប្រទេសជប៉ុនប្រចាំនៅកម្ពុជា។
ក្នុងកិច្ចប្រជុំនោះបានពិភាក្សា ដោយផ្តោតសំខាន់ទៅលើការងារធំៗចំនួន២ដូចជា ទី១ ការពង្រីកវិសាលភាពកំពង់ផែស្វយ័ត ក្រុងព្រះសីហនុ ឱ្យក្លាយជាកំពង់ផែប្រចាំតំបន់ និងទី២ គម្រោងសិក្សា និងរៀបចំបង្កើតតំបន់សេដ្ឋកិច្ចពិសេសកម្ពុជា- ជប៉ុន ដែលជាតំបន់សេដ្ឋកិច្ចពិសេសបង្កើតឡើង ដើម្បីជំរុញលើកទឹកចិត្តវិនិយោគិនជប៉ុនឱ្យមកវិនិយោគនៅកម្ពុជាកាន់តែច្រើន។
ជប៉ុន គឺជាដៃគូពាណិជ្ជកម្ម និងវិនិយោគសំខាន់របស់កម្ពុជា
យោងតាមធនាគារជាតិនៃកម្ពុជា បើគិតត្រឹមត្រីមាសទី១ នៃឆ្នាំ ២០២៣ ជប៉ុន ជាប្រទេសដែលវិនិយោគផ្ទាល់ នៅកម្ពុជាច្រើនជាងគេទី៤ ដោយមានទឹកប្រាក់សរុប១១,៣ ទ្រីលានរៀល (កើន ១១,៦ ភាគរយ ធៀបរយៈពេលដូចគ្នាឆ្នាំ ២០២២) គឺបន្ទាប់ពីប្រទេសចិន កូរ៉េ និងសិង្ហបុរី។ វិនិយោគិនជប៉ុនភាគច្រើនវិនិយោគ នៅក្នុងវិស័យហិរញ្ញវត្ថុ សំណង់ សណ្ឋាគារ និងអចលនទ្រព្យ ជាដើម។
ស្ថិតិពាណិជ្ជកម្មអន្តរជាតិរបស់អគ្គនាយកដ្ឋានគយ និងរដ្ឋាករកម្ពុជាឱ្យដឹងថា ក្នុងឆ្នាំ២០២៣ ការធ្វើពាណិជ្ជកម្មរវាងកម្ពុជា-ជប៉ុន មានទឹកប្រាក់សរុប១,៨ពាន់លានដុល្លារ ធ្លាក់ចុះ៧,២ភាគរយ ធៀបឆ្នាំ ២០២២ ដែលមាន១,៩៤ ពាន់លានដុល្លារ។
ក្នុងនោះទំនិញកម្ពុជា នាំទៅប្រទេសជប៉ុន មានចំនួន១,១៧ ពាន់លានដុល្លារ កើន០,២ភាគរយ និងទំនិញជប៉ុននាំមកកម្ពុជា មានចំនួន៦២៣,៦ លានដុល្លារ ធ្លាក់ចុះ១៨,៥ ភាគរយ៕
