ដោយ: គង់ លាងហួរ
អន្តរជាតិ: មន្ត្រីកម្ពុជាអះអាងថា កំពង់ផែអន្តរជាតិឡុងអាន (Long An)នៅប្រទេសវៀតណាម មានសក្ដានុពល និងអាចប្រែក្លាយទៅជាស្ពានតភ្ជាប់រំហូរពាណិជ្ជកម្មដ៏សំខាន់មួយ សម្រាប់ប្រទេសវៀតណាម និងកម្ពុជា។
កំពង់ផែនេះ នឹងក្លាយជាច្រកទ្វារព្រំដែនអន្តរជាតិ សម្រាប់ទំនិញឆ្លងកាត់ពីកម្ពុជាផងដែរ។អភិបាលខេត្តស្វាយរៀង លោក ប៉េង ពោធិ៍សា បានលើកឡើងយ៉ាងដូចនេះ បន្ទាប់ពីលោកបានបំពេញ ដំណើរទស្សនកិច្ចការងារ ទៅកាន់ខេត្តLong An ប្រទេសវៀតណាម ដើម្បីជំរុញកិច្ចសហប្រតិបត្តិការរវាងខេត្តជាប់ព្រំដែននៃប្រទេសទាំងពីរ។
កំពង់ផែ Long An ស្ថិតក្នុងទីតាំងភូមិសាស្ត្រអំណោយផល ដែលត្រូវបានគេរំពឹងថា នឹងមិនត្រឹមតែក្លាយជា មជ្ឈមណ្ឌលពាណិជ្ជកម្មដ៏សំខាន់ សម្រាប់ទំនិញរវាងប្រទេសទាំង២ប៉ុណ្ណោះទេ ប៉ុន្តែថែមទាំងបង្កភាពងាយស្រួល សម្រាប់ការដឹកទំនិញ រវាងប្រទេសផ្សេងៗទៀតផងដែរ។
អភិបាលខេត្តស្វាយរៀងរូបនេះបានសង្កត់ធ្ងន់ថា នៅពេលដែលកំពង់ផែLong An ប្រែក្លាយជាច្រកទ្វារព្រំដែនអន្តរជាតិ សម្រាប់ពាណិជ្ជកម្ម នោះវានឹងជួយបង្កើតផ្លូវ ដឹកជញ្ជូនអន្តរជាតិចម្រុះ ពីកម្ពុជា ដោយឆ្លងកាត់ប្រទេសវៀតណាម ឆ្ពោះទៅកាន់ប្រទេសនានាជុំវិញពិភពលោក។
ទន្ទឹមនឹងនេះដែរ កាលពីពេលថ្មីៗកន្លងទៅ បណ្តាសហគ្រិនវៀតណាម និងកម្ពុជាជាច្រើន បានធ្វើដំណើរទស្សនកិច្ច មកកាន់ទីក្រុងLong An ដើម្បីស្វែងយល់ពីលទ្ធភាពនាំទំនិញចូល និងចេញពីកម្ពុជាតាមរយៈកំពង់ផែនេះ។
