ដោយ: គង់ លាងហួរ
តូក្យូ: ប្រទេសជប៉ុនគ្រោងផ្តល់លទ្ធភាព ដល់ជនបរទេសដែលមានទេពកោសល្យ និងអ្នកធ្វើការពីចម្ងាយ ឬហៅថា“ក្រុម Digital nomads” ឱ្យស្នាក់នៅបានយូរនៅក្នុងប្រទេសរបស់ខ្លួន ក្រោមប្រព័ន្ធទិដ្ឋាការថ្មី ដើម្បីជំរុញកំណើនសេដ្ឋកិច្ច និងការប្រើប្រាស់។
ក្រោមប្រព័ន្ធទិដ្ឋាការថ្មី រដ្ឋាភិបាលនឹងអនុញ្ញាតឱ្យក្រុមជនបរទេស Digital nomads អាចរស់នៅក្នុងប្រទេសជប៉ុន បានរហូតដល់ប្រាំមួយខែ បើធៀបនឹងការអនុញ្ញាត នាពេលបច្ចុប្បន្នចំនួន៩០ថ្ងៃ ក្រោមទិដ្ឋាការទេសចរណ៍រយៈពេលខ្លី។
ដើម្បីទទួលបានទិដ្ឋាការនេះ ជនបរទេសទាំងនោះ នឹងត្រូវបំពេញលក្ខខណ្ឌមួយចំនួន ដូចជា ត្រូវតែជាពលរដ្ឋរស់នៅ ក្នុងប្រទេស និងតំបន់ចំនួន៤៩ ដែលលើកលែងទិដ្ឋាការ និងមានសន្ធិសញ្ញាពន្ធជាមួយប្រទេសជប៉ុន និងមានប្រាក់ចំណូលប្រចាំឆ្នាំលើសពី៦៨.២០០ដុល្លារ។ ចំណែក ប្តី ឬប្រពន្ធ និងកូនៗរបស់ពួកគេ ក៏នឹងត្រូវបានអនុញ្ញាត ឱ្យចូលមកស្នាក់នៅប្រទេសជប៉ុនផងដែរ។
ឆ្នាំសារពើពន្ធ២០២៣ រាប់ចាប់ពីថ្ងៃទី១ ខែមេសា២០២៣ ដល់ថ្ងៃទី៣១ ខែមីនា ឆ្នាំ២០២៤។ចំណាត់ការនេះធ្វើឡើង ស្របពេលដែលមជ្ឈដ្ឋានធុរកិច្ច បានស្នើឱ្យរដ្ឋាភិបាល ពង្រីកកិច្ចខិតខំប្រឹងប្រែង ដើម្បីស្វាគមន៍ក្រុម Digital nomads ចូលមកក្នុងប្រទេសរបស់ខ្លួន។ បច្ចុប្បន្ន គេព្យាករណ៍ថា មានមនុស្សជាង៣៥លាននាក់ កំពុងធ្វើការជាក្រុមDigital nomadsនៅទូទាំងពិភពលោក។
លោក Ryuji Koizumi រដ្ឋមន្ត្រីក្រសួងយុត្តិធម៌ បានថ្លែងក្នុងសន្និសីទសារព័ត៌មានមួយថា ក្រុម Digital nomads អាចក្លាយជាប្រភពនៃការច្នៃប្រឌិត។ ស្របពេលដែលប្រទេសជាច្រើន កំពុងខិតខំប្រឹងប្រែង ដើម្បីទាក់ទាញពួកគេ យើងសង្ឃឹមថា ប្រជាជនទាំងនោះនឹងធ្វើការនៅក្នុងប្រទេសជប៉ុនផងដែរ”៕
