ដោយៈ គង់ សូរិយា
ភ្នំពេញៈ ធនាគារជាតិនៃកម្ពុជា(NBC)បានបង្កើនការព្យាករណ៍ ថា កំណើនឥណទានលើវិស័យសំណង់ និងអចលនទ្រព្យនឹងសម្រេចបានកំណើនជាង១០ភាគរយនៅឆ្នាំ២០២៤នេះ។
យោងតាមរបាយការណ៍ នៃការព្យាករណ៍របស់ស្ថាប័នខាងលើនេះបានបង្ហាញថា ការបែងចែកប្រាក់កម្ចីតាមវិស័យ រួមមាន សណ្ឋាគារ និងភោជនីយដ្ឋាន បានកើនឡើង០,៦ភាគរយប៉ុណ្ណោះ ការលក់ដុំ កើនឡើង៤,៨ភាគរយ ការទិញលំនៅដ្ឋានកើនឡើង៦,៤ ភាគរយអចលនទ្រព្យកើនឡើង១៦,៩ភាគរយ និងសំណង់កើន១៣,៩ភាគរយ។
អ្នកអភិវឌ្ឈន៍ជាច្រើនបាន និងកំពុងត្រូវការឥណទាន ពីធនាគារនានា ដើម្បីសម្រេចបាននូវវឌ្ឍនភាពរបស់ខ្លួន នៅពេលទីផ្សារទិញ លក់កំពុងជួបភាពមិនច្បាស់លាស់។
អគ្គនាយិកាក្រុមហ៊ុនAmatak Property Service លោកស្រីតាំង ហួរបានមានប្រសាសន៍ថា ស្ថានភាពទីផ្សារក្នុងវិស័យសំណង់ និងអចលនទ្រព្យ កំពុងបង្ហាញសញ្ញាល្អប្រសើរឡើង ដែលច្បាស់ណាស់ តម្រូវការឥណទាននឹងកើនឡើង ហើយនៅពេលឥណទានឬលុះហូរសាច់ប្រាក់ចាក់ចូលទីផ្សារ វានឹងធ្វើឲ្យវិស័យនេះងើបឡើងវិញ។លោកស្រីបន្តថា “វិស័យនេះមិនហក់ឡើងវិញលឿនខ្លាំងនោះទេ តែវាកំពុងបង្ហាញសញ្ញាងើបឡើងវិញសន្សឹមៗ”៕