ដោយ: គង់ លាងហួរ
ប៉េកាំង: ទីផ្សារអចលនទ្រព្យនៅប្រទេសចិន ហាក់កម្រើកឡើងវិញសន្សឹមៗ បន្ទាប់ពីតម្លៃផ្ទះ និងប្រាក់ចំណូលពីការលក់ដីរបស់រដ្ឋាភិបាល ត្រូវបានគេសង្កេតឃើញមានការកើនឡើង។
ការកម្រើកឡើងវិញបន្តិចនេះកើតឡើង បន្ទាប់ពីតុលាការក្រុងហុងកុង បានចេញសាលក្រមរំលាយក្រុមហ៊ុន Evergrande ដែលជាអ្នកអភិវឌ្ឍន៍លំនៅដ្ឋានធំបំផុត លំដាប់ទី២របស់ប្រទេសចិន។
យោងតាមការស្ទង់មតិ របស់ក្រុមហ៊ុនស្រាវជ្រាវអចលនទ្រព្យ China Index Academy ក្នុងខែកុម្ភៈ ឆ្នាំ២០២៤ បានឱ្យដឹងថា តម្លៃផ្ទះជាមធ្យម នៅទូទាំងទីក្រុងរបស់ប្រទេសចិន បានកើនឡើង ០,១៥ភាគរយ បើធៀបនឹងខែធ្នូ ដែលនេះជាកំណើនលឿនបំផុត គិតចាប់តាំងពីពាក់កណ្តាលឆ្នាំ២០២១។
ជាមួយគ្នានេះ ប្រាក់ចំណូលដែលរដ្ឋាភិបាលចិន ទទួលបានពីការលក់ដីបានកើនឡើង១,៨ភាគរយ នៅក្នុងខែធ្នូ ឆ្នាំ២០២៣ បើធៀបនឹងរយៈពេលដូចគ្នាក្នុងឆ្នាំ២០២២ ហើយនេះជាលើកដំបូងដែលការលក់ដី បានកើនឡើងក្នុងរយៈពេល២៣ខែ។
បើទោះបីជាតួលេខកំណើនខាងលើ ហាក់មិនសូវមានអត្រាខ្ពស់យ៉ាងណាក្តី ប៉ុន្តែវាក៏បង្ហាញថា ការដាក់ចេញគោលនយោបាយរបស់រដ្ឋាភិបាលចិន បានចាប់ផ្តើមទទួលផ្លែផ្កាខ្លះផងដែរ។
រដ្ឋាភិបាលចិនកំពុងធ្វើការយ៉ាងសកម្ម ដើម្បីស្តារទីផ្សារអចលនទ្រព្យក្នុងស្រុកឡើងវិញ បន្ទាប់ពីដាំក្បាលចុះកាលពីដើមឆ្នាំ២០២២ ដែលបណ្តាលមកពីការសាងសង់ លំនៅដ្ឋានច្រើនលើសតម្រូវការ និងបញ្ហាខកខានសងបំណុល។
ដើម្បីទប់ទល់នឹងវិបត្តិនេះ អាជ្ញាធរចិនបានខិតខំដាក់ចេញយុទ្ធសាស្ត្រជំរុញការចំណាយរបស់អ្នកប្រើប្រាស់ និងការវិនិយោគ។ តួយ៉ាង កាលពីពេលថ្មីៗនេះ ប្រទេសចិនបានចាក់បញ្ចូលសាច់ប្រាក់ងាយស្រួលថ្មីទៅក្នុងទីផ្សារ តាមរយៈការកាត់បន្ថយតម្រូវការដើមទុនរបស់ធនាគារផងដែរ។
ទោះជាយ៉ាងនេះក្តី កាលពីពេលកន្លងទៅ តុលាការហុងកុងបានសម្រេចរំលាយក្រុមហ៊ុន Evergrande ដែលជាអ្នកអភិវឌ្ឍអចលនទ្រព្យធំទី២របស់ចិន ដោយជម្រះទ្រព្យសម្បត្តិទាំងអស់ មុនពេលក្ស័យធន ដើម្បីសងបំណុលចំនួន៣០០ពាន់លានដុល្លាររបស់ខ្លួន។
ក្រុមអ្នកជំនាញលើកឡើងថា ស្ថានភាពនេះកាន់តែស្មុគស្មាញ ខណៈចិន មិនទទួលស្គាល់សាលក្រមខាងលើឡើយ។ យោងតាមក្រុមហ៊ុនហិរញ្ញវត្ថុអាមេរិក Fitch Ratings បានឱ្យដឹងថា ចិននឹងត្រូវការពេលវេលាយូរបន្ថែមទៀត ដើម្បីស្តារទំនុកចិត្តរបស់អ្នកទិញផ្ទះឡើងវិញ។
រដ្ឋាភិបាលចិន បានដាក់ចេញបទប្បញ្ញត្តិថ្មីជាបន្តបន្ទាប់ ដើម្បីជួយស្តារក្រុមហ៊ុនអចលនទ្រព្យឯកជន។ ជាក់ស្តែង ទីក្រុងមួយចំនួន បានលុបចោល ការរឹតបន្តឹងលើការទិញផ្ទះ និងផ្តល់ប្រាក់កម្ចីចំនួន៤៦លានដុល្លារ ដល់អ្នកអភិវឌ្ឍន៍អចលនទ្រព្យ៕
