ដោយ: គង់ លាងហួរ
អន្តរជាតិ: នៅក្នុងរយៈពេល២ខែដំបូង នៃឆ្នាំ២០២៤នេះ មហាសេដ្ឋីឥណ្ឌា លោកGautam Adani បានក្លាយជាបុគ្គលដែលរកចំណូ លបានច្រើនបំផុតទី២ នៅលើពិភពលោកលោក បន្ទាប់ពីស្ថាបនិកក្រុមហ៊ុន Meta លោក Mark Zuckerberg។
យោងតាមសារព័ត៌មាន Bloomberg បានចុះផ្សាយថា ក្នុងរយៈពេល២ខែនេះ ស្ថាបនិកបណ្តាញសង្គម Facebook លោក Mark Zuckerberg រកចំណូលបានជាង៤០ពាន់លានដុល្លារ ខណៈដែលមហាសេដ្ឋីឥណ្ឌា លោកAdani រកចំណូលបានជាង១៦ពាន់លានដុល្លារ។
ការរកបានប្រាក់ចំណូល ដ៏ច្រើនសន្ធឹកសន្ធាប់នេះ បានជំរុញឱ្យទ្រព្យសម្បត្តិសរុប របស់ម្ចាស់ក្រុមហ៊ុនAdani Group កើនឡើងដល់ទំហំទឹកប្រាក់ប្រមាណ១០១ពាន់លានដុល្លារ តាមពីក្រោយមហាសេដ្ឋីឥណ្ឌាម្នាក់ទៀតគឺ លោក Mukesh Ambani ត្រឹមតែ៧ពាន់លានដុល្លារប៉ុណ្ណោះ។
ទ្រព្យសម្បត្តិដ៏មហាសាលរបស់លោក Gautam Adani បានហក់ឡើង ដល់កម្រិត១០០ពាន់លានដុល្លារជាលើកដំបូង គិតចាប់តាំងពីក្រុមហ៊ុនស្រាវជ្រាវអាមេរិកដ៏តូចមួយ ឈ្មោះ Hindenburg បានចេញផ្សាយរបាយការណ៍ បង្អាប់កេរ្តិ៍ឈ្មោះរបស់លោក។
ក្រុមហ៊ុនស្រាវជ្រាវមួយនេះ ធ្លាប់បានចោទប្រកាន់ថា លោក Adani បានលួចបន្លំទិន្នន័យផ្សារហ៊ុន ដែលការណ៍នេះ បានធ្វើឱ្យក្រុមហ៊ុនរបស់លោក ខាតបង់ប្រាក់អស់មិនចេះតិច និងធ្វើឱ្យទ្រព្យសម្បត្តិផ្ទាល់ខ្លួនរបស់លោកដាំក្បាលចុះ អស់រាប់ពាន់លានដុល្លារកាលពីពេលមុន៕
