ដោយៈ គង់ សូរិយា
បន្ទាយមានជ័យៈ ក្នុងផែនការពង្រីកឧស្សាហកម្មផ្លូវអាកាស រដ្ឋាភិបាលកម្ពុជា បានដាក់ចេញផែនការយុទ្ឋសាស្រ្តកែលំអរ និងសាងសង់អាកាសយានដ្ឋានចំនួន៧ ក្នុងនោះមានក្រុងប៉ោយប៉ែត នៃទឹកដីខេត្តបន្ទាយមានជ័យផងដែរ។
យោងតាមរបាយការណ៍របស់ រដ្ឋលេខាធិការដ្ឋានអាកាសចរណ៍ស៊ីវិល ដែលបានផ្សព្វផ្សាយកាលពីដើមសប្តាហ៍នេះ បានឲ្យដឹងថា រដ្ឋាភិបាលគ្រោងនឹងកែលំអរ និងស្ថាបនាព្រលានយន្តហោះនៅខេត្តចំនួន៧ រួមមាន ព្រលានយន្តហោះខេត្តមណ្ឌលគិរី ព្រលានយន្តហោះ ខេត្តកំពង់ឆ្នាំង ព្រលានយន្តហោះខេត្តបាត់ដំបង ព្រលានយន្តហោះ ក្រុងប៉ោយប៉ែត ខេត្តបន្ទាយមានជ័យ ព្រលានយន្តហោះតារាសាគរ ខេត្តកោះកុង ព្រលានយន្តហោះខេត្តស្ទឹងត្រែង និងព្រលានយន្តហោះខេត្ត និងព្រលានយន្តហោះកោះរ៉ុង ខេត្តព្រះសីហនុ។
ផែនការនេះ នឹងមានរយៈពេល៥ឆ្នាំ ដោយចាប់ផ្តើមពីឆ្នាំ២០២៤ ដល់ឆ្នាំ២០២៨ខាងមុខ។លោកសួង សុខហ៊ាងសហស្ថាបនិកក្រុមហ៊ុនStars Gold ដែលមានមូលដ្ឋាននៅក្រុងប៉ោយប៉ែត បានសម្តែងអារម្មណ៍រីករាយនៅពេលទទួលបានដំណឹងនេះ ដោយលោកបានមានប្រសាសន៍ថា ប្រសិនជាក្រុងប៉ោយប៉ែត មានព្រលានយន្តហោះនេះ ទីក្រុងប៉ោយប៉ែតនឹងមានសន្ទុះរីកចម្រើនកាន់តែខ្លាំងថែមទៀត នាពេលអនាគត។
លោលបញ្ជាក់ថា “ក្នុងនាមវិស័យឯកជន ពិតជាចង់ឃើញព្រលានយន្តហោះ មានវត្តមាននៅក្រុងប៉ោយប៉ែតនាពេលខាងមុខនេះ”។ លោកសួង សុខហ៊ាងបានបន្តថា ក្រុងប៉ោយប៉ែត មានទីតាំងព្រលានយន្តហោះចាស់រួចហើយ ដែលស្ថិតនៅក្នុងភូមិកូនដំរី សង្កាត់និម្មិត ក្រុងប៉ោយប៉ែត និងមានចម្ងាយប្រមាណ១៥គីឡូម៉ែត្រ ពីព្រំប្រទល់ដែនកម្ពុជា ថៃ៕