Hattha top Banner

ប្រទេសសិង្ហបុរីកំពុងស្នើសុំទិញដីពីម៉ាឡេស៊ីដើម្បីអភិវឌ្ឍតំបន់ប៉ុស្តិ៍ត្រួតពិនិត្យព្រំដែនឡើងវិញ

0

ដោយ: គង់ លាងហួរ

អន្តរជាតិ: អ្នកនាំពាក្យនៃអាជ្ញាធរអន្តោប្រវេសន៍ និងត្រួតពិនិត្យ (ICA) បានលើកឡើងថា សិង្ហបុរីកំពុងរង់ចាំការឆ្លើយតបរបស់ម៉ាឡេស៊ី ចំពោះសំណើសុំទិញដីតូចៗចំនួន២ឡូតិ៍ ដែលជាកម្មសិទ្ធិរបស់ស្នងការដែនដីសហព័ន្ធនៃប្រទេសម៉ាឡេស៊ី (Federal Lands Commissioner of Malaysia)។

អាជ្ញាធរICA របស់សិង្ហបុរី បានឆ្លើយតបទៅនឹងសំណួររបស់ប្រព័ន្ធផ្សព្វផ្សាយ បន្ទាប់ពីរបាយការណ៍របស់កាសែត The Star ជាភាសាអង់គ្លេស បានចុះផ្សាយថា ប្រទេសម៉ាឡេស៊ី មិនទាន់សម្រេចចិត្តថាតើខ្លួននឹងលក់ដីចំនួន២ឡូតិ៍ នោះទៅឱ្យសិង្ហបុរីនៅឡើយនោះទេ។

ICA បានអះអាងថា “បច្ចុប្បន្នដីចំនួនពីរឡូតិ៍នោះ មិនទាន់ត្រូវបានគេប្រើប្រាស់នៅឡើយទេ។ ទីតាំងដីនោះស្ថិតនៅចំកណ្តាល​តំបន់ ដែលសិង្ហបុរីនឹងត្រូវអភិវឌ្ឍន៍ ទៅជាប៉ុស្តិ៍ត្រួតពិនិត្យច្រក​ព្រំដែន​គោក Woodlands ថ្មីរបស់ខ្លួន”​។

កាសែតម៉ាឡេស៊ីបានដកស្រង់សម្តី ឧត្តមស្នងការម៉ាឡេស៊ីប្រចាំ​ប្រទេសសិង្ហបុរី គឺលោក Azfar Mohamad Mustafar មកចុះផ្សាយថា “វាជារឿងសមហេតុផលណាស់ សម្រាប់សិង្ហបុរីក្នុងការទិញយកដីនោះ”។

លោក​ក៏​បាន​បញ្ជាក់ផងដែរ​ថា កិច្ចព្រមព្រៀងលក់​ ឬ​ប្តូរដី​ ដែល​ប្រទេស​ទាំង​ពីរ​បាន​ធ្វើ​កន្លង​មក​ នៅ​មិន​ទាន់​សម្រេច​ចេញជាផ្លែផ្កាបាន​ទេ។

នៅក្នុងរបាយការណ៍របស់កាសែត The Star លោក Datuk Azfar បានអះអាងថា “ដីទំនេរចំនួន២កន្លែងនោះ គ្របដណ្តប់លើផ្ទៃដីប្រហែល០,៩៣ហិកតា ហើយខ្ញុំបានស្នើរសុំការប្តូរដី ប៉ុន្តែរឿងនេះអាស្រ័យលើរដ្ឋាភិបាលសហព័ន្ធ ជាអ្នកធ្វើការសម្រេចចិត្ត”។

នាយករដ្ឋមន្ត្រីម៉ាឡេស៊ី លោក Anwar Ibrahim បានលើកឡើងថា “ប្រទេសសិង្ហបុរីបានទាមទារដី ដែលបច្ចុប្បន្នស្ថិតក្រោមការគ្រប់គ្រងរបស់អាជ្ញាធរម៉ាឡេស៊ី សម្រាប់យកទៅអភិវឌ្ឍប៉ុស្តិ៍ត្រួតពិនិត្យ Woodlands ថ្មីឡើងវិញ ហើយម៉ាឡេស៊ីនឹងសម្រួលដល់ការលក់ដីទាំងនោះ”។

គម្រោងពង្រីកប៉ុស្តិ៍ត្រួតពិនិត្យ Woodlands ថ្មី ឱ្យដល់ប្រហែល៥ដង នៃទំហំរបស់ប៉ុស្តិ៍ត្រួតពិនិត្យបច្ចុប្បន្ន គ្រោងនឹងចាប់ផ្តើមសាងសង់នៅឆ្នាំ២០២៥ និងចែកចេញជាច្រើនដំណាក់កាល៕

LEAVE A REPLY

Please enter your comment!
Please enter your name here