ដោយៈ គង់ សូរិយា
មណ្ឌលគិរីៈ តម្លៃដីធ្លី និងសកម្មភាពអភិវឌ្ឍន៍គំរោងរមណីយដ្ឋាន សេវាកម្មបដិសណ្ឋារកិច្ចបានពុះកញ្រ្ជោលឡើង ក្រោយពេលរដ្ឋាភិបាលបានអនុញ្ញាត្តឲ្យក្រុមហ៊ុនធំមួយ សិក្សាលទ្ឋភាពវិនិយោគព្រលានយន្តហោះនៅខេត្តមណ្ឌលគិរី។
បន្ទាប់មកអ្វីៗបានស្ងប់ស្ងាត់ ជាមួយនឹងវិបត្តិជាបន្តបន្ទាប់ដូចជា ជំងឺកូវីដ១៩ បញ្ហាសង្រ្គាម និងបញ្ហាភូមិសាស្រ្តនយោបាយនានា។
ប៉ុន្តែពេលនេះ អ្នកមណ្ឌលគិរី និងអ្នកអភិវឌ្ឍន៍នៅតំបន់នោះមានទឹកមាត់លេបឡើងវិញ ក្រោយពេលរដ្ឋាភិបាលប្រកាសអនុញ្ញាត្តឲ្យក្រុមហ៊ុនពហុជាតិសាសន៍Focus Consortium សិក្សាលទ្ឋភាពសាងសង់ព្រលានយន្តហោះ និងទីក្រុងរណបនៅខេត្តមួយនេះ។
លោកស៊ា ឆៃលីនអគ្គនាយកក្រុមហ៊ុនឆៃលីនស៊ា រៀលអេស្ទេតបានមានប្រសាសន៍ឲ្យដឹងតាមតេឡេក្រាម កាលពីថ្ងៃទី ៦ មិនា កន្លង មកថា ស្ថានភាពទីផ្សារអចលនទ្រព្យ ដីធ្លី ការសាងសង់រមណីយដ្ឋានមិនទាន់មានសន្ទុះខ្លាំងនៅឡើយទេ ប៉ុន្តែមានសកម្មភាពសួរនាំ និងការចុះសាកសួរពីអ្នកវិនិយោគក្នុងស្រុក និងអ្នកវិនិយោគមកពីប្រទេសចិន កូរ៉េមួយចំនួនបានសាកសួរ និងចុះទៅមើល បន្ទាប់ពីមានការប្រកាសវត្តមានក្រុមហ៊ុនថ្មី ដែលចាប់អារម្មណ៍សាងសង់ព្រលានយន្តហោះក្នុងខេត្តនេះ។
លោកបន្តថា “សម្រាប់ដីកសិកម្ម មានការទិញលក់ច្រើន ដែលមានទំហំចាប់ពី១០០ហិកតា រហូតដល់ខ្ទង់ពាន់ហិកតា ដែលតម្លៃមានចន្លោះពី៤០០០ ទៅ១២០០០ដុល្លារក្នុងមួយហិកតា”។លោកបន្តថា “តម្លៃដីនៅក្នុងទីក្រុងសែនមនោរម្យ ដែលមានទំហំចាប់ពី១០០ម៉ែត្រការ៉េ មានតម្លៃចន្លោះ៣០០ទៅ១០០០ដុល្លារក្នុងមួយម៉ែត្រការ៉េ”។
លោកស៊ា ឆៃលីនបានបន្តថា ជាមួយគ្នានេះ គំរោងដែលបានដំណើរការសាងសង់កន្លងមក នៅក្នុងខេត្តមណ្ឌលគិរីបាននិងកំពុងបន្តសកម្មភាពសាងសង់ និងដំណើរការគំរោងរបស់ពួកគេផងដែរ ប៉ុន្តែមានសកម្មភាពយឺតៗ។
រដ្ឋាភិបាលកម្ពុជាបានរៀបចំផែនការមេ អភិវឌ្ឍន៍វិស័យទេសចរណ៍ ខេត្តមណ្ឌលគិរី ឆ្នាំ២០២៣ ២០៣៥ ដែលគ្រោងប្រែក្លាយខេត្តនេះជាប៉ូលសេដ្ឋកិច្ចថ្មីមួយ តាមរយៈកាតរយៈសាងសង់ព្រលានយន្តហោះ ការសាងសង់ផ្លូវល្បឿនលឿនភ្នំពេញ មណ្ឌលគិរី ការសាងសង់ទីក្រុងរណប និងផែនការលំអិតជាច្រើនទៀត ដោយធ្វើយ៉ាងណាឲ្យខេត្តនេះអាចទាក់ទាញ ភ្ញៀវទេសចរណ៍អន្តរជាតិបានប្រមាណ១លាននាក់ និងភ្ញៀវទេសចរណ៍ក្នុងស្រុក ចំនួន៤លាននាក់ក្នុងមួយឆ្នាំ។
លើសពីនេះ តាមផែនការមេនេះ ក្រសួងទេសចរណ៍គ្រោងរៀបចំដាំផ្កា និងបន្លែ តាមរយៈការលើកទឹកចិត្ត វិស័យឯកជនចូលរួមវិនិយោគ សម្រាប់ផ្គត់ផ្គង់ដល់សណ្ឋាគារ រមណីយដ្ឋាននៅទូទាំងប្រទេស ដោយសារខេត្តនេះមានដីមានជីជាតិល្អ និងលក្ខខ័ណ្ឌអាកាសធាតុអំណោយផល។
ខេត្តមណ្ឌលគិរីមានប្រជាជនរស់នៅ សរុបប្រមាណ១០ម៉ឺននាក់ មានក្រុងចំនួន១ និងស្រុកចំនួន…ដូចជា ក្រុងសែនមនោរម្យ ស្រុកអូររាំង ស្រុកកែវសីម៉ា ស្រុកកោះញែក និងស្រុកពេជ្រាដា៕
