ដោយ: គង់ លាងហួរ
អន្តរជាតិ: ក្រុមហ៊ុនផលិតអាហារ និងភេសជ្ជៈដ៏ល្បីឈ្មោះ របស់សហរដ្ឋអាមេរិកPepsiCo Inc គ្រោងបណ្តាក់ទុនវិនិយោគបន្ថែមទៀត ក្នុងប្រទេសវៀតណាម ដើម្បីសាងសង់រោងចក្រថ្មីចំនួន២ ដែលដំណើរការដោយថាមពលកកើតឡើងវិញ។
ការប្រកាសផែនការវិនិយោគបន្ថែមនេះ បានធ្វើឡើងក្នុងឱកាសដែលគណៈប្រតិភូ នៃសហគ្រាសអាមេរិកជាង៦០សហគ្រាស រួមទាំងក្រុមហ៊ុន Suntory PepsiCo Vietnam Beverage បានមកបំពេញទស្សនកិច្ច ការងាររយៈពេល៣ថ្ងៃ នៅប្រទេសវៀតណាមក្នុងសប្តាហ៍មុន។យោងតាមប្រភពពីរដ្ឋាភិបាលវៀតណាម បានគូសបញ្ជាក់ឱ្យដឹងថា ក្រុមហ៊ុន PepsiCo គ្រោងសាងសង់រោងចក្រថ្មីចំនួន២បន្ថែមទៀត នៅក្នុងប្រទេសរបស់ខ្លួន ជាមួយដើមទុនចំនួន៤០០លានដុល្លារ។ នេះបើយោងតាមការចុះផ្សាយ ដោយសារពត៌មាន Reuters។
រោងចក្រផលិតភេសជ្ជៈមួយ នឹងស្ថិតនៅក្នុងខេត្ត Long An ភាគខាងត្បូងនៃប្រទេសវៀតណាម ដោយគ្រោងចំណាយប្រាក់ជាង៣០០លានដុល្លារ ហើយរោងចក្រមួយទៀតគឺ រោងចក្រកែច្នៃម្ហូបអាហារ នឹងស្ថិតនៅខេត្តHa Nam ភាគខាងជើង ជាមួយនឹងទុនវិនិយោគ៩០លានដុល្លារ។ទោះបីជាយ៉ាងនេះក្តី របាយការណ៍មិនបានផ្តល់ព័ត៌មានលម្អិតអំពីពេលវេលា នៃការដាក់ឱ្យដំណើរការរោងចក្រទាំង២នេះនោះទេ។ បច្ចុប្បន្ន ក្រុមហ៊ុន PepsiCo កំពុងដំណើរការរោងចក្រចំនួន៥កន្លែង នៅទូទាំងប្រទេសវៀតណាម ក្រោយពីបានឈានជើងចូលប្រទេសនេះក្នុងឆ្នាំ១៩៩៤។
កាលពីចុងឆ្នាំ២០២៣កន្លងទៅ ក្រុមហ៊ុនPepsiCo ធ្លាប់អះអាងថា ខ្លួនបានទទួលវិញ្ញាបនបត្រវិនិយោគ សម្រាប់សាងសង់រោងចក្រនៅខេត្ត Ha Nam ដែលគ្រោងនឹងដាក់ឱ្យដំណើរការ នៅក្នុងត្រីមាសទី៣នៃឆ្នាំ២០២៥ខាងមុខ៕