ដោយៈ ជេស៊ីកា
ភ្នំពេញៈ ក្រុមហ៊ុនអាកាសចរណ៍កម្ពុជា អង្គរអ៊ែរ (Cambodia Angkor Air) បានប្រកាសពីការចាប់ផ្តើម បើកការហោះហើរត្រង់ចាប់ពីថ្ងៃទី១៦ ខែមិថុនា តទៅរវាងរាជធានីភ្នំពេញ ទៅទីក្រុងញូវដែលី។ យោងតាមសេចក្តីប្រកាសរបស់ក្រុមហ៊ុន កម្ពុជា អង្គរអ៊ែរ កាលពីថ្ងៃទី ២៤ ខែមីនា ជើងហោះហើរត្រង់នឹងចាប់ផ្តើមពីថ្ងៃទី ១៦ ខែមិថុនា ដោយហោះហើរ៤ជើង ក្នុង១សប្តាហ៍។
ក្រុមហ៊ុនបានបញ្ជាក់ថា ការដាក់ឱ្យដំណើរការជើងហោះហើរថ្មីប្រកបដោយមោទនភាពរបស់យើង ក្នុងការហោះហើរទៅកាន់ប្រទេសឥណ្ឌា នឹងចាប់ផ្តើមពីថ្ងៃទី ១៦ ខែមិថុនា ឆ្នាំ ២០២៤។ ក្រុមហ៊ុនកម្ពុជាអង្គរអ៊ែរនឹងចាប់ផ្តើមការធ្វើដំណើរដ៏អស្ចារ្យមួយនៅពេលយើងចាប់ផ្ដើមដំណើរការជើងហោះហើរត្រង់ ដំបូងបំផុតពីភ្នំពេញទៅកាន់ទីក្រុងញូវដែលី ដោយហោះហើរចំនួន៤ជើង ក្នុង១សប្តាហ៍ ដើម្បីបម្រើដល់វិស័យទេសចរណ៍កម្ពុជា និងឥណ្ឌា នៅឆ្នាំ២០២៤”។
ផ្លូវហោះហើរថ្មីរវាងទីក្រុងភ្នំពេញ-ញូវដែលី គឺជាផ្នែកបន្ថែមនៃការប្តេជ្ញាចិត្តរបស់ក្រុមហ៊ុន ក្នុងការបម្រើអ្នកដំណើរ ដោយផ្តល់ការតភ្ជាប់ដ៏ងាយស្រួល ទៅគោលដៅដ៏អស្ចារ្យក្នុងរយៈពេលដ៏ខ្លីខាងមុខ។
ក្រុមហ៊ុនបន្ថែមថា “ដំណើរទៅកាន់តំបន់អច្ឆរិយៈ ជាប្រវត្តិសាស្ត្រនៃប្រទេសទាំង២ គឺជាសុបិនមួយក្លាយជាការពិត សម្រាប់អ្នកផ្សងព្រេងដែលស្វែងរកប្រាសាទជាច្រើន កន្លែងប្រវត្តិសាស្ត្រ និងតំបន់ព័ទ្ធជុំវិញដោយធម្មជាតិដ៏គួរឱ្យភ្ញាក់ផ្អើល”។
ផ្លូវហោះហើរថ្មីនេះនឹងទាក់ទាញភ្ញៀវទេសចរ និងអ្នកធ្វើដំណើរធុរកិច្ចកាន់តែច្រើន ដែលរួមចំណែកដល់ការអភិវឌ្ឍវិស័យទេសចរណ៍ និងសេដ្ឋកិច្ចនៃប្រទេសទាំងពីរ។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានមានប្រសាសន៍ថា ផែនការរបស់ក្រុមហ៊ុនអាកាសចរណ៍នេះក្នុងការចាប់ផ្ដើម ដំណើរការហោះហើរត្រង់ ទៅកាន់ប្រទេសឥណ្ឌា នឹងនាំមកនូវអត្ថប្រយោជន៍យ៉ាងច្រើន ដល់វិស័យទេសចរណ៍ និងពាណិជ្ជកម្មរវាងប្រទេសទាំង២។ទោះយ៉ាងណាលោកអះអាងថា ភាពជោគជ័យនៃប្រតិបត្តិការនេះ ក៏អាស្រ័យលើការកំណត់តម្លៃផងដែរ។
លោកបញ្ជាក់ថា “នេះជាដំណឹងល្អ ដែលយើងបានរង់ចាំអស់រយៈពេលជាច្រើនឆ្នាំមកហើយ។ ខ្ញុំបាននិយាយជាច្រើនដងហើយថា ទីផ្សារប្រទេសឥណ្ឌាមានសារៈសំខាន់ខ្លាំងណាស់ ពីព្រោះឥណ្ឌាជាប្រទេសដ៏អស្ចារ្យ បើនិយាយពីចំនួនអ្នកធ្វើដំណើរជុំវិញពិភពលោក”។ លោកបន្ថែមថា “បន្ទាប់ពីប្រទេសចិន ឥណ្ឌាគឺជាប្រទេសធំជាងគេ ហើយមានទាំងវប្បធម៌ និងប្រពៃណីដ៏យូរអង្វែង”។
ប្រធានសហព័ន្ឋទេសចរណ៍កម្ពុជា លោកឌិន សុមេធារិទ្ឋបានមានប្រសាសន៍ឲ្យដឹងកាលពីសប្តាហ៍មុនថា ប្រតិបត្តិករណ៍ទេសចរណ៍ឥណ្ឌាបានមកកាន់កម្ពុជាបណ្តើរៗហើយ ដើម្បីស្វែងរកឱកាសវិនិយោគ និងសិក្សាពីដំណើរទស្សនកិច្ចថា ពួកគេទៅទស្សនានៅទីណានៅរាជធានីភ្នំពេញ ក្រុងព្រះសីហនុ និងខេត្តសៀមរាប។
លោកបន្តថា “មានភ្ញៀវទេសចរណ៍បែបវប្បធ៌ម និងភ្ញៀវចូលចិត្តលេងនៅតាមកាស៊ីណូ ដែលនេះនឹងផ្តល់ផលប្រយោជន៍ទាំងនៅរាជធានីភ្នំពេញ ក្រុងព្រះសីហនុ និងខេត្តសៀមរាបផងដែរ”៕
