ដោយៈ គង់ សូរិយា
ភ្នំពេញៈ ក្រុមអ្នកជំនាញបានលើកឡើងថា ស្ថានភាពទីផ្សារខុនដូមានភាពប្រសើរ ប៉ុន្តែទីផ្សារនេះបានពឹងផ្អែក លើជនបរទេសឡើងវិញ បន្ទាប់ពីស្ថានភាពមិនច្បាស់លាស់របស់វិស័យនេះ។
អគ្គនាយកក្រុមហ៊ុនERA Cambodia លោកខន គង្គាបានមានប្រសាសន៍ឲ្យដឹងតាមបណ្តាញ តេឡេក្រាមកាលពីល្ងាចថ្ងៃទី២៦ មិនាថា ទីផ្សារខុនដូ សម្រាប់អតិថិជន ក្នុងស្រុកមិនសូវមានភាពអំណោយផលនោះទេ ដោយបច្ចុប្បន្ននេះ អ្នកទិញក្នុងស្រុកមានមួយៗប៉ុណ្ណោះ។
លោកបន្តថា “ទីផ្សារខុនដូ បានងាកពឹងផ្អែកលើជនបរទេសច្រើន បន្ទាប់ពីវិបត្តិកូវីដ១៩ និងបញ្ហាសេដ្ឋកិច្ចសកលបន្តអូសបន្លាយរហូតមកទល់ពេលនេះ”។
លោកខន គង្គាបានបន្តថា យើងបាននិងកំពុងពង្រឹងបុគ្គលិកផ្នែកលក់របស់យើង ដើម្បីដាក់ចេញយុទ្ឋសាស្រ្តថ្មីៗ ក្នុងគោលដៅទាក់ទាញ ការវិនិយោគពីអតិថិជនក្នុងស្រុក និងអ្នកវិនិយោគអន្តរជាតិ។
ជាមួយគ្នានេះ លោកបណ្ឌិតBen Li អគ្គនាយកក្រុមហ៊ុនUrban Hub & Factory Phnom Penh ដែលកំពុងវិនិយោគខុនដូដ៏ធំមួយនៅលើមហាវិថី៦០ម៉ែត្រ បានមានប្រសាសន៍ថា អ្នកវិនិយោគអន្តរជាតិកាន់តែច្រើន បានស្វែងរកឱកាសវិនិយោគខុនដូនៅកម្ពុជា ដោយសារការវិនិយោគនៅទីនេះ ទទួលបានផលចំណេញពីការវិនិយោគខ្ពស់ធៀបជាមួយបណ្តាប្រទេសក្នុងតំបន់អាស៊ាន។
លោកបណ្ឌិតបានបន្តថា “កម្ពុជាមានភាពអំណោយផលច្រើន សម្រាប់ការវិនិយោគរបស់ជនបរទេស ដោយពួកគេអាចបើកក្រុមហ៊ុនជាមួយភាគហ៊ុន១០០ភាគរយ ពួកគេអាចយកប្រាក់ចំណេញចេញបានដោយមិនបង់ពន្ឋ”។ លោកបន្ថែមថា “ការប្រើប្រាស់ប្រាក់ដុល្លារអាមេរិកយ៉ាងទូលំទូលាយ និងការបង់ពន្ឋដែលមានភាពច្បាស់លាស់ ការមានប្រជាជនវ័យក្មេងច្រើន បាននិងកំពុងទាក់ទាញការចាប់អារម្មណ៍ពីវិនិយោគិនអន្តរជាតិ។
កាលពីពេលថ្មីៗនេះ មានរបាយការណ៍ស្រាវជ្រាវថ្មីមួយ ដោយបានបង្ហាញថា កម្ពុជាស្ថិតក្នុងចំណោមប្រទេសចំនួន១០ នៅលើពិភពលោក ដែលអ្នកវិនិយោគសឹង្ហបុរី បានស្វែងរកការវិនិយោគអចលនទ្រព្យច្រើន៕
