ដោយៈ គង់ សូរិយា
ភ្នំពេញៈ ក្រសួងសាធារណៈការ និងដឹកជញ្ជូនបានបើកវគ្គបណ្តុះបណ្តាលពិសេសមួយស្តីពី ការឌីសាញស្ពាន(Bridge Design)
ដើម្បីពង្រឹងគុណភាពការងារសាងសង់ ហេដ្ឋារចនាសម្ព័ន្ធផ្លូវថ្នល់ ធានានូវការប្រើប្រាស់ឱ្យបានគង់វង្ស និងយូរអង្វែង។
ក្រសួងសាធារណៈការបើកវគ្គបណ្ដុះបណ្ដាលបច្ចេកទេសលើ ការឌីហ្សាញស្ពាន “Bridge Design”
លោកយិត បុណ្ណា រដ្ឋលេខាធិការ តំណាងដ៏ខ្ពង់ខ្ពស់រដ្ឋមន្ត្រី ក្រសួងសាធារណការ និងដឹកជញ្ជូន បានអញ្ជើញបើកវគ្គបណ្ដុះបណ្ដាលបច្ចេកទេសស្ដីពី ការឌីហ្សាញស្ពាន “Bridge Design” ដោយមានការចូលរួមពីវិស្វករជំនាញ មកពីអង្គភាពថ្នាក់កណ្ដាលរបស់ក្រសួងសាធារណការ និងដឹកជញ្ជូន និងគ្រប់មន្ទីរសាធារណការ និងដឹកជញ្ជូនទាំង២៥ រាជធានី-ខេត្ត ដែលជាអង្គភាពអនុវត្តការងារសាងសង់ហេដ្ឋារចនាសម្ព័ន្ធផ្លូវថ្នល់ ស្ថិតក្រោមអាណាប័កក្រសួងសាធារណការ និងដឹកជញ្ជូន និងមន្ត្រីបច្ចេកទេសពាក់ព័ន្ធជាច្រើនរូប។
វគ្គបណ្ដុះបណ្ដាលនេះ ត្រូវបានរៀបចំឡើងមានរយៈពេល៣ថ្ងៃ ចាប់ពីថ្ងៃទី២៧-២៩ ខែមីនា ឆ្នាំ២០២៤ ក្នុងគោលបំណងផ្តល់ឱ្យវិស្វករ អ្នកជំនាញ និងផ្នែកពាក់ព័ន្ធទាំងអស់ ស្វែងយល់បន្ថែមនូវវិធីសាស្ត្រឌីហ្សាញស្ពាន ដែលធ្វើបទបង្ហាញដោយអ្នកជំនាញការ មកពីក្រុមហ៊ុនសាជីវកម្មស្ពាន និងថ្នល់ចិន (China Road and Bridge Cooperation – CRBC) ដើម្បីទទួលបានជាធាតុចូលសំខាន់ៗ នៅក្នុងការឌីហ្សាញស្ពាន ក្នុងន័យអនុវត្តការងារស្ថាបនាស្ពានឱ្យកាន់តែមានគុណភាព និងប្រសិទ្ធភាព ស្របនឹងតម្រូវការប្រើប្រាស់ និងចក្ខុវិស័យក្នុងការស្ថាបនាស្ពានធំៗដោយវិស្វិករខ្មែរ។
លោកបានរំលេចពីសារៈសំខាន់ ក្នុងការរៀបចំវគ្គបណ្ដុះបណ្ដាលបច្ចេកទេសនីមួយៗ ដែលមិនមែនត្រឹមតែការបណ្ដុះបណ្ដាលតែមួយផ្នែកនោះទេ ការរៀបចំនេះក៏ជាវេទិកាមួយ សម្រាប់អ្នកបច្ចេកទេសផ្លូវថ្នល់ ក្នុងការផ្លាស់ប្តូរបទពិសោធន៍ការងារ ចែករំលែកនូវចំណេះដឹង ចំណេះធ្វើ ដែលបានឆ្លងកាត់កន្លងមក លើការងារសាងសង់ទៅតាមស្ថានភាពទីតាំងភូមិសាស្រ្តរៀងៗខ្លួន ហើយយកចំនេះដែលទទួលបាន បម្រើដល់ការអនុវត្តការងារប្រចាំថ្ងៃ ក៏ដូចជាធ្វើការបណ្តុះបណ្ដាលបន្ត ដើម្បីបំពេញបន្ថែមនូវចំណុច ដែលកំពុងខ្វះខាតរបស់ក្រុមការងារបច្ចេកទេស នៃសាមីអង្គភាពនីមួយៗ ក្នុងន័យចូលរួមពង្រឹងនូវគុណភាព ការងារសាងសង់ហេដ្ឋារចនាសម្ព័ន្ធ ផ្លូវថ្នល់ ព្រមទាំងស្នើឱ្យអគ្គនាយកដ្ឋានបច្ចេកទេស បន្តពិនិត្យលើមុខវិជ្ជាចាំបាច់មួយចំនួនទៀតជាអាទិភាព ដែលត្រូវរៀបចំបណ្តុះបណ្តាលនាពេលខាងមុខបន្តទៀត៕
