ដោយៈ គង់ សូរិយា
ភ្នំពេញៈ លោកឧបនាយករដ្ឋមន្រ្តីស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានគូសបញ្ជាក់ពីអាទិភាព១០ចំណុច ដែលវិនិយោគិនគួរសិក្សា និងគួរជ្រើសរើសយកប្រទេសកម្ពុជា សម្រាប់បណ្ដាក់ទុនវិនិយោគរបស់ខ្លួន។
លោកស៊ុន ចាន់ថុល បានថ្លែងបែបនេះ ក្នុងពិធីបើកឱកាសដល់វិនិយោគិនដែលមកពី៧០ក្រុមហ៊ុនផ្សេងៗគ្នា សាកសួរដោយផ្ទាល់នូវសំណួរនានា អំពីការវិនិយោគនៅកម្ពុជា ជាពិសេសគឺចំណុចអាទិភាព ក៏ដូចជាទីផ្សារក្នុងប្រទេសកម្ពុជា កាលពីដើមខែមេសានេះ។
លោកឧបនាយករដ្ឋមន្រ្តី បានលើកឡើងពីអាទិភាព១០ ចំណុច ដែលវិនិយោគិនគួរមកធ្វើធុរកិច្ចនៅកម្ពុជា រួមមាន ទី១ ដោយផ្ដើមចេញពីកត្តាសុខសន្តិភាព ទី២ ស្ថិរភាពនយោបាយ ទី៣ កំណើនសេដ្ឋកិច្ចរ៉ឹងមាំ ទី៤ ស្ថិរភាពម៉ាក្រូសេដ្ឋកិច្ច ទី៥ ធនធានមនុស្ស ទី៦ ហេដ្ឋារចនាសម្ព័ន្ធសង្គម ទី៧ ច្បាប់វិនិយោគដែលមានភាពបើកចំហរជូនវិនិយោគិន ទី៨ វេទិការដ្ឋាភិបាល និងផ្នែកឯកជនសម្រាប់ដោះស្រាយបញ្ហាប្រឈមនានារបស់វិនិយោគិន ទី៩ ស្ថានភាពទីផ្សាររបស់កម្ពុជា ដែលភ្ជាប់ទៅកាន់ពិភពលោក តាមរយៈកិច្ចព្រមព្រៀងពាណិជ្ជកម្មជាច្រើនរួមមាន អាស៊ាន (AFTA) កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងទី១០. ប្រព័ន្ធអនុគ្រោះពន្ធ EBA ជាដើម។
វេទិកាធុរកិច្ចត្រូវបានរៀបចំឡើង ដោយសភាពាណិជ្ជកម្មចិន រួមសហការជាមួយសហភាពសហគ្រិន តំបន់ឈូងសមុទ្រពិសេស ក្វាងទុង-ហុងកុង-ម៉ាកាវ (GBA)នេះធ្វើឡើង ដើម្បីបញ្ជ្រាបផ្សព្វផ្សាយសក្ដានុពលរបស់ប្រទេសកម្ពុជា ទៅវិនិយោគិនប្រមាណ៧០ក្រុមហ៊ុនផ្សេងៗគ្នាលើវិស័យជាច្រើន៕