តើសេដ្ឋកិច្ចអាមេរិកនឹងជួបផលវិបាកបែបណា ប្រសិនបើធនាគារកណ្តាលអាមេរិកមិនបញ្ចុះអត្រាការប្រាក់នៅឆ្នាំនេះ?

ក្រុមអ្នកវិនិយោគបង្ហាញបំណង ចង់ឃើញការបញ្ចុះអត្រាការប្រាក់ ព្រោះការធ្វើបែបនេះ នឹងជួយកាត់បន្ថយការចំណាយលើការខ្ចីប្រាក់ ដែលអាចជួយបង្កើនប្រាក់ចំណេញ ហើយវាក៏មានន័យថា វិនិយោគិនមានលុយកាន់តែច្រើន ដើម្បីចាក់ចូលទៅក្នុងទីផ្សារ។

ទោះ​ជា​យ៉ាង​ណាក្តី គេសង្កេតឃើញថា តម្លៃផ្សារហ៊ុន Dow ផ្សារហ៊ុន S&P 500 និងផ្សារហ៊ុន Nasdaq Composite បានធ្លាក់ថ្លៃចុះប្រហែល២%  បន្ទាប់ពីទិន្នន័យដែលចេញផ្សាយ កាលពីសប្តាហ៍មុនបានបង្ហាញថា អតិផរណាតម្លៃទំនិញប្រើប្រាស់ បានកើនឡើងខ្ពស់ជាងការរំពឹងទុកនៅក្នុងខែមីនា។

លោក Itay Goldstein សាស្ត្រាចារ្យផ្នែកហិរញ្ញវត្ថុនៅសាលា Wharton School of Business នៃសាកលវិទ្យាល័យ Pennsylvania បានលើកឡើងថា ការណ៍នេះនឹងជះផលប៉ះពាល់ទៅលើសេដ្ឋកិច្ចអាមេរិក ដោយសារតែការធ្លាក់ថ្លៃចុះនៃភាគហ៊ុនអាចបង្ខំឱ្យក្រុមហ៊ុននានា ពន្យារពេលក្នុងការវិនិយោគ ឬកាត់បន្ថយការចំណាយ។

លោក Goldstein បញ្ជាក់ទៀតថា “ការកើនឡើងនៃអត្រាការប្រាក់ ធ្វើឱ្យមនុស្សមានទំនោរសន្សំប្រាក់ ជាជាងការវិនិយោគ ឬការចំណាយដែលធ្វើឲ្យសេដ្ឋកិច្ចធ្លាក់ចុះ”។ លោកបានបន្ថែមថា “ហានិភ័យនោះនឹងកើនឡើង ប្រសិនបើធនាគារ Fed មិនកាត់បន្ថយអត្រាការប្រាក់នៅឆ្នាំនេះ”។

ចំណែក លោក Brian Rose សេដ្ឋវិទូជាន់ខ្ពស់អាមេរិកនៅក្រុមហ៊ុន UBS Global Wealth Management បានបន្ថែមថា ការកើនឡើងនៃអត្រាការប្រាក់ នឹងបង្កើនការចំណាយលើការខ្ចីប្រាក់ ដែលអាចជះផលប៉ះពាល់អវិជ្ជមាន លើការចំណាយរបស់អ្នកប្រើប្រាស់ ការវិនិយោគអាជីវកម្ម និងទីផ្សារលំនៅដ្ឋាន៕ប្រភព:CNN៕