ដោយ: គង់ លាងហួរ
អន្តរជាតិ: រដ្ឋាភិបាលកូរ៉េខាងត្បូង គ្រោងសាងសង់សមិទ្ធិផលថ្មីបន្ថែមទៀត ដូចជាផែទេសចរណ៍នៅដងទន្លេ Han ក្នុងទីក្រុងសេអ៊ូល ដើម្បីប្រែក្លាយរដ្ឋធានីនេះទៅជា “ទីក្រុងទន្លេ”នៅឆ្នាំ២០៣០ខាងមុខ។នេះបើយោងតាមសារពត៌មាន Korea Times។
គម្រោងតម្លៃ៥៥០ពាន់លានវ៉ុន (ប្រមាណ៤០១លានដុល្លារ)នេះ រួមមាន ការសាងសង់សណ្ឋាគារបណ្តែតទឹក អគារការិយាល័យ ភោជនីយដ្ឋានអន្តរជាតិ និងកំពង់ផែទេសចរណ៍ក្នុងទីក្រុង។ ផែបណ្តែតទឹកនេះ ក៏នឹងមានកន្លែងញ៉ាំអាហារលំដាប់អន្តរជាតិ កន្លែងសំដែងដោយផ្ទាល់នៅលើឆាក ការដឹកជញ្ជូនតាមផ្លូវទឹក និងសេវាកម្មទេសចរណ៍ ផ្សេងៗជាច្រើនទៀត។
ចំណែកកីឡាក្នុងទឹក និងហេដ្ឋារចនាសម្ព័ន្ធលំហែរ ដូចជា ឧទ្យានជិះស្គីលើទឹកតាមខ្សែកាប ក៏នឹងត្រូវបានរៀបចំឡើងផងដែរ។ លើសពីនេះ ទីក្រុងសេអ៊ូល ក៏គ្រោងនឹងរៀបចំព្រឹត្តិការណ៍វប្បធម៌នៅតាមដងទន្លេ និងកម្មវិធីកម្សាន្តជាច្រើនដូចជា ក្បួនដង្ហែទូក និងការចាក់បញ្ចាំងភាពយន្តជាដើម។បន្ថែមពីលើនេះ នៅខែតុលាខាងមុខ ទីក្រុងសេអ៊ូលនឹងបង្កើតកំពង់ផែមួយ នៅភាគខាងលិចនៃទន្លេរ Han នៅខាងក្រោមចុងខាងត្បូងនៃស្ពាន Mapo Bridge ដើម្បីជួយសម្រួលដល់ប្រតិបត្តិការសាឡាងទេសចរណ៍។
ចំណែកឯ ដើមទុនវិនិយោគមានប្រភព មកពីលុយរដ្ឋចំនួន២៣៦,៦ពាន់លានវ៉ុន គួបផ្សំជាមួយនឹងការផ្តល់មូលនិធិឯកជនចំនួន៣១៣,៥ពានលានវ៉ុន។
យោងតាមរដ្ឋបាលទីក្រុងសេអ៊ូលបានឱ្យដឹងថា បច្ចុប្បន្នផែ បណ្តែតទឹកនៅលើទន្លេរHan មានអ្នកមកទស្សនាត្រឹមតែប្រមាណ៩០ម៉ឺននាក់ប៉ុណ្ណោះក្នុងមួយឆ្នាំៗ ខណៈដែលសួនច្បារមាត់ទន្លេទទួលបានអ្នកមកទស្សនាជាង៦៩លាននាក់។
លោក Oh Se-hoon អភិបាលក្រុងសេអ៊ូល បានថ្លែងក្នុងសន្និសីទសារព័ត៌មានមួយ នៅសាលាក្រុងសេអ៊ូល ថា “គំនិតផ្តួចផ្តើមនេះមានគោលបំណងបង្កើនសក្ដានុពល កំណើនសេដ្ឋកិច្ចក្នុងទីក្រុង ដោយប្រើប្រាស់ទន្លេរ ដែលហូរកាត់រដ្ឋធានីសេអ៊ូល”។
លោក Oh បានមានប្រសាសន៍ឱ្យដឹងបន្ថែមទៀតថា “គម្រោងនេះនឹងប្រែក្លាយទន្លេរHan ទៅជាកន្លែងមួយ ដែលប្រជាពលរដ្ឋអាចមកលំហែរីករាយ នឹងជីវិតប្រចាំថ្ងៃរបស់ពួកគេ”។ ទន្លេរ Han នឹងប្រែក្លាយទៅជាមជ្ឈមណ្ឌលកម្សាន្ត និងជាមជ្ឈមណ្ឌលនៃការអភិវឌ្ឍន៍”។
ជាមួយគ្នានេះ រដ្ឋបាលទីក្រុងសេអ៊ូលរំពឹងថា គម្រោងនេះនឹងបង្កើតបានផលចំណេញ ផ្នែកសេដ្ឋកិច្ចក្នុងទំហំទឹកប្រាក់ចំនួន៩២៥,៦ពាន់លានវ៉ុន ក្នុងមួយឆ្នាំនិងបង្កើតការងារបានប្រហែល៦.៨០០កន្លែង៕ប្រភព: Korea Times៕