ដោយ: គង់ លាងហួរ
អន្តរជាតិ: ប្រទេសកាតា ទួរគី អ៊ីរ៉ាក់ និងអារ៉ាប់រួម បានចុះហត្ថលេខាលើអនុស្សរណៈ នៃការយោគយល់គ្នាចតុភាគី ដើម្បីបង្កើតគម្រោងផ្លូវអភិវឌ្ឍន៍ ក្នុងគោលបំណងតភ្ជាប់បណ្តាប្រទេស នៅតំបន់មជ្ឈឹមបូព៌ា និងតំបន់អឺរ៉ុប តាមរយៈប្រទេសទួរគី។
ពិធីចុះហត្ថលេខានេះរៀបចំឡើងនៅរដ្ឋធានី Baghdad ប្រទេសអ៊ីរ៉ាក់ ក្រោមអធិបតីភាពរបស់ប្រធានាធិបតីទួរគី លោក Recep Tayyip Erdogan និងនាយករដ្ឋមន្ត្រីអ៊ីរ៉ាក់ លោក Mohammed Shia Al-Sudani។
ចំណែក ប្រទេសកាតាបានចាត់ឱ្យរដ្ឋមន្ត្រី ក្រសួងដឹកជញ្ជូនរបស់ខ្លួនមកចូលរួមជាអ្នកតំណាង។
ប្រសិនបើបញ្ចប់ការសាងសង់រួចរាល់ គម្រោងនេះនឹងលាតសន្ធឹងប្រវែង១.២០០គីឡូម៉ែត្រ និងតភ្ជាប់កំពង់ផែ Grand Faw នៅភាគខាងត្បូង នៃប្រទេសអ៊ីរ៉ាក់ ទៅកាន់ភាគខាងជើងនៃព្រំដែនទួរគី និងអឺរ៉ុប តាមរយៈផ្លូវដែក និងផ្លូវហាយវេ។
គម្រោងនេះ នឹងត្រូវបានអនុវត្តន៍ជា៣ដំណាក់កាល ដោយដំណាក់កាលដំបូងត្រូវបានគេរំពឹងថា នឹងបញ្ចប់រួចរាល់នៅឆ្នាំ២០២៨។ ដំណាក់កាលទីពីរនឹងបញ្ចប់នៅឆ្នាំ២០៣៣ ខណៈដំណាក់កាលទីបីនឹងបញ្ចប់នៅឆ្នាំ២០៥០។
គម្រោងតម្លៃ១៧ពាន់លានដុល្លារនេះ ក៏នឹងប្រែក្លាយអ៊ីរ៉ាក់ទៅជាមជ្ឈមណ្ឌលពាណិជ្ជកម្ម ដ៏សំខាន់មួយរបស់ពិភពលោក។ បច្ចុប្បន្នការនាំចេញប្រេង គ្របដណ្តប់ចំណែកជាង៥៥ភាគរយ នៃផលទុនជាតិសរុប(GDP)របស់ប្រទេសនេះ។
ខុទ្ទកាល័យនាយករដ្ឋមន្ត្រីអ៊ីរ៉ាក់ បានបញ្ជាក់នៅក្នុងសេចក្តីថ្លែងការណ៍មួយថា “កិច្ចព្រមព្រៀងចតុភាគីនេះ នឹងរួមចំណែកដល់ការជំរុញកំណើនសេដ្ឋកិច្ច និងការពង្រឹងកិច្ចសហប្រតិបត្តិការ ក្នុងតំបន់ និងអន្តរជាតិរវាងតំបន់មជ្ឈឹមបូព៌ា និងប្រទេសលោកខាងលិច ហើយវាក៏នឹងផ្តល់នូវផ្លូវដឹកជញ្ជូន ដែលមានការប្រកួតប្រជែងថ្មី និងលើកកម្ពស់វិបុលភាពសេដ្ឋកិច្ចក្នុងតំបន់”៕ប្រភព: Doha News៕
