ដោយ វុត្ថា
ព្រះសីហនុ៖ ក្រុមហ៊ុនកោះរ៉ុងដាយសិនធឺរ ទូកហែបភីបូតខេត្តព្រះសីហនុ បានសម្ពោធដាក់ឱ្យប្រើប្រាស់នាវាទេសចរណ៍តម្លៃ ១,៨៥ លានដុល្លាអាមេរិច សម្រាប់ដឹកអ្នកដំណើរឆ្លងទៅលេងកម្សាន្តនៅនៅកោះរ៉ុងខេត្តព្រះសីហនុ។
លោក យន្ត មីន អភិបាលខេត្តព្រះសីហនុថ្លែងនៅក្នុងពិធីកាត់ខ្សែបូរសម្ពោធដាក់ ឱ្យប្រើប្រាស់នូវនាវាទេសចរណ៍នេះ កាលពីថ្ងៃទី ៨ ខែមីនាម្សិលមិញនេះថា នាវាទេសចរណ៍នេះ ជាផ្នែកមួយយ៉ាងសំខាន់ក្នុងការបម្រើឱ្យវិស័យទេសចរណ៍ក្នុងខេត្តព្រះសីហនុ ពិសេសការដឹកជញ្ជូនតាម ផ្លូវទឹកទៅកាន់កោះនានាក្នុងខេត្តព្រះសីហនុ កាន់តែទំនើប មានសុវត្ថិភាពបន្ថែមទៀត ធានាបាននូវសុវត្ថិភាពជូនភ្ញៀវទេសចរ ។
លោកបន្តថា ក្រុមហ៊ុននឹងនាំនាវាទេសចរណ៍ទំនើបៗបន្ថែមទៀត ដើម្បីឆ្លើយតប ទៅនឹងតម្រូវការកើនឡើងនូវភ្ញៀវទេសចរ ម្យ៉ាងទៀតការដឹកជញ្ជូនតាមផ្លូវទឹកមានសារៈសំខាន់ណាស់ ធ្វើឱ្យភ្ញៀវមានទំនុកចិត្តមកលេងកម្សាន្តខេត្តព្រះសីហនុ ។
លោក សេង ហួលាង តំណាងក្រុមហ៊ុន កោះរ៉ុងដាយសឺនធឺរ មានឲ្យដឹងដែរថា ដើម្បីបម្រើឱ្យវិស័យទេសចរណ៍ក្នុងខេត្តព្រះសីហនុ ដែលមានសក្តានុពលផ្នែកទេសចរណ៍ ម្យ៉ាងភ្ញៀវទេសចរកើនឡើង ជាពិសេសខេត្តមានការអភិវឌ្ឍមានសន្ទុះយ៉ាងលឿន គួបផ្សំនឹងចរាចរណ៍ផ្លូវទឹក មានការមមាញឹក ក្រុមហ៊ុននាំនាវាទំនើបមកបន្ថែមទៀត ។
បច្ចុប្បន្នក្រុមហ៊ុនមាននាវាទំនើបចំនួន ០៤គ្រឿង គួបផ្សំនឹងទូកឈើជិត១០គ្រឿង ក៏ប៉ុន្តែការដឹកជញ្ជូនតាមផ្លូវទឹកមិនទាន់ឆ្លើយតបតាមតម្រូវការភ្ញៀវទេសចរ ។ នាវាអាចផ្ទុកមនុស្សបានរហូតដល់ ៤៥០នាក់ ក្នុងនោះក៏មានភេសជ្ជៈ ម្ហូបអាហារ មានបន្ទប់ម៉ាស៊ីនត្រជាក់ បន្ទប់ទឹក ធានាសុវត្ថិភាព ដើម្បីបម្រើឱ្យទាន់សម័យទាំងភ្ញៀវជាតិ និងអន្តរជាតិដូចប្រទេសជិតខាង ។
