ដោយៈ ស៊ីវ ម៉េង
ភ្នំពេញៈ ការសិក្សាថ្មីមួយរបស់ក្រុមហ៊ុនCBRE Cambodia Researchបានរកឃើញថា នៅត្រីមាសទីមួយនៃឆ្នាំ២០២៤នេះ ការជួលហាងអាជីវកម្ម នៅតាមដងផ្លូវធំៗ និងផ្សារទំនើបបានកើនឡើង៩ភាគរយ។ប៉ុន្តែទោះជាយ៉ាងណាការជួលផ្ទះល្វែង ផ្សារទំនើបសហគមន៍ និងកន្លែងផ្សេងទៀតបានធ្លាក់ចុះ។
ការសិក្សាដែលធ្វើឡើងដោយក្រុមហ៊ុនCBRE រៀងរាល់ត្រីមាសនេះបានបង្ហាញទៀតថា អត្រានៃការគ្របដណ្តប់លើប្រើប្រាស់ជាមធ្យម នៅកន្លែងពាណិជ្ជកម្មលក់រាយ បាននឹងកំពុងធ្លាក់ចុះពីមកនៅត្រឹម៦៣,៤ភាគរយ នៅក្នុងត្រីមាសទីមួយនៃឆ្នាំ២០២៤ ធៀបនឹង៩០ភាគរយ កាលពីឆ្នាំ២០១៩។
ទន្ទឹមនឹងនេះ ក៏មានកន្លែងលក់រាយពាណិជ្ជកម្មថ្មី ទំហំ១០១.០០០ ម៉ែត្រការ៉េបន្ថែមទៀតដែលរំពឹងថា នឹងមាននៅក្នុងឆ្នាំ ២០២៤នេះ។ នេះមានន័យថា វានឹងក្លាយជាទីផ្សាររបស់អ្នកជួល ដែលមានអំណាចចរចាច្រើនជាងម្ចាស់ទីតាំង។
ទិន្នន័យនេះអាចបញ្ជាក់បានថា យីហោលក់រាយអាចផ្លាស់ទីទៅទីតាំងធំៗ និងទំនើប ប្រសិនបើអាចបញ្ចុះតម្លៃ និងការលើកទឹកចិត្តផ្សេងទៀតដែលផ្តល់ដោយម្ចាស់ទីតាំង។
លោកស្រីតាំង ហួរអគ្គនាយិកាក្រុមហ៊ុនAmatak Property Service Co, Ltd និងជាអនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានលើកឡើងហាក់ស្របគ្នានឹងការសិក្សាខាងលើ ដោយលោកស្រីបានមានប្រសាសន៍ថា ការស្វែងរកទីតាំងសម្រាប់អាជីវកម្មនានាបានធ្លាក់ចុះ ខណៈតម្លៃនៅក្នុងទីផ្សារបានថយចុះស្របគ្នាផងដែរ។
លោកស្រីបញ្ជាក់ថា ”មានតែទីតាំងល្អៗ ដែលអាចប្រកបអាជីវកម្មបាន ទើបមានតម្រូវការខ្លះៗ ប៉ុន្តែអ្នកជួលនៅតែមានអំណាចក្នុងការចចារទាញទម្លាក់តម្លៃផងដែរ”៕