ដោយ: គង់ លាងហួរ
អន្តរជាតិ: មហាសេដ្ឋីកំពូលៗបានបោះទុនវិនិយោគយ៉ាងច្រើនទៅលើការទិញមាស។ ប៉ុន្តែ ខុសប្លែកពីគេ លោក Warren Buffett បែរជាផ្តល់អនុសាសន៍មិនឱ្យវិនិយោគលើមាសទៅវិញ។
បើទោះបីជាតម្លៃហាងឆេងមាសបានហក់ឡើងដល់កម្រិតខ្ពស់បំផុតមិនធ្លាប់មានយ៉ាងណាក្តី ប៉ុន្តែ លោក Buffett ដែលជាអ្នកវិនិយោគដ៏ជោគជ័យបំផុតមួយរូប និងជាប្រធានក្រុមហ៊ុន Berkshire Hathaway ហាក់មិនចាប់អារម្មណ៍សោះឡើយចំពោះការវិនិយោគទៅលើលោហៈធាតុដ៏មានតម្លៃមួយនេះ។
តួយ៉ាង នៅក្នុងលិខិតចុះកាលពីឆ្នាំ២០១១ ផ្ញើទៅកាន់ម្ចាស់ភាគហ៊ុនរបស់ក្រុមហ៊ុន Berkshire Hathaway លោក Buffett បានគូសបញ្ជាក់ថា មាសគឺជាទ្រព្យសម្បត្តិផ្តល់ផលចំណេញ និងផ្តល់ផលិតភាពនៅមានកម្រិត។
មហាសេដ្ឋីរូបនេះបាន លើកឡើងថា “មនុស្សមួយចំនួនបានទិញមាសទុក ដោយ សារតែពួកគេរំពឹង ថា នឹងទទួលបានផលចំណេញពីការលក់បន្តទៅឱ្យអ្នកទិញដទៃផ្សេងទៀតនៅក្នុងតម្លៃខ្ពស់ជាងមុននាពេលអនាគត”។
លោក Buffett បានសង្កត់ធ្ងន់ថា ការវិនិយោគលើភាគហ៊ុន ឬដីដាំដំណាំ នឹងផ្តល់ផលចំណេញច្រើននៃដំណាំ និងភាគលាភច្រើនក្នុងឆ្នាំនេះ។ ចំណែកឯ មាសមួយអោននៅតែជាមាសមួយអោនដដែល។
ខុសផ្ទុយពីលោក Buffett មហាសេដ្ឋីផ្សេងទៀតដូចជាលោក Ray Dalio លោក David Einhorn លោកJohn Paulson និងលោក Jacob Rothschild គឺជាអ្នកបោះទុនវិនិយោគយ៉ាងធំទៅលើទីផ្សារមាស។ នេះបើយោងតាមក្រុមហ៊ុនព័ត៌មានហិរញ្ញវត្ថុ Benzinga ។
ជាពិសេស មូលនិធិ Greenlight Capital បានបង្ហាញសុទិដ្ឋិនិយមចំពោះការវិនិយោគទៅលើមាស ដោយចាត់ទុកមាសគឺជាវត្ថុការពារអតិផរណា។ លោក David Einhorn ដែលជាស្ថាបនិកមូលនិធិនេះ បានលើកឡើងថា “យើងមានមាសច្រើនណាស់ និងថែមទាំងមានរបារដុំមាសទៀតផង។មាសមានសារៈសំខាន់ណាស់សម្រាប់យើង”។
ចំណែក លោកមហាសេដ្ឋី Ray Dalio ដែលជាស្ថាបនិកក្រុមហ៊ុនគ្រប់គ្រងការវិនិយោគអាមេរិក Bridgewater Associates ក៏កំពុងកាន់កាប់មាសផងដែរ ដើម្បីការពារហានិភ័យដែលអាចកើតមានពីការកើនឡើងអតិផរណា និងវិបត្តិបំណុលដែលកំពុងកើនឡើងនៅក្នុងសហរដ្ឋអាមេរិក។ នេះបើយោងតាមកាសែត Business Insider ៕ប្រភព: Vnexpress៕
