ដោយវុត្ថា
ភ្នំពេញ៖ រដ្ឋាភិបាលកម្ពុជា បានចេញអនុក្រឹត្យបង្កើតតំបន់ទេសចរណ៍ពិសិដ្ឋ ក្នុងគោលបំណងជំរុញការអភិវឌ្ឍផលិតផលទេសចរណ៍ ទាក់ទាញភ្ញៀវទេសចរជាតិ អន្តរជាតិ និងជំរុញការវិនិយោគលើវិស័យទេសចរណ៍ ដើម្បីរួមចំណែកអភិវឌ្ឍសេដ្ឋកិច្ច សង្គមកម្ពុជា។
អនុក្រឹត្យលេខ ៤០ អនក្រ: បក ដែលចុះហត្ថលេខាដោយសម្តេចតេជោ ហ៊ុន សែន នាយករដ្ឋីមន្ត្រីនៃកម្ពុជាកាលពីថ្ងៃទី ៧ ខែមីនា ឆ្នាំ ២០១៩ កន្លងមកនេះ នេះថា គឺក្នុងគោលដៅកំណត់វិធាន និងយន្តការក្នុងការបង្កើត និងគ្រប់គ្រងតំបន់ទេសចរណ៍ពិសិដ្ឋ។
អនុក្រឹត្យដែលមាន ៦ ជំពូក និង ៥ មាត្រា នេះ បន្តថា តំបន់ទេសចរណ៍ពិសិដ្ឋ ត្រូវបានអនុញ្ញាតឱ្យបង្កើតឡើងនៅលើទឹកដីនៃកម្ពុជា នៅតាមតំបន់សក្តានុពលទេសចរណ៍សមស្រប ប្រកបដោយយុទ្ធសាស្ត្រ ស្របតាមច្បាប់ជាធរមាន និងការសម្រេចរបស់ រាជរដ្ឋាភិបាលកម្ពុជាដោយអនុក្រឹត្យ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ឲ្យដឹងដែរថា ការបង្កើតអនុក្រឹត្យរបស់រដ្ឋាភិបាលនេះ ពិតជាមានសារៈសំខាន់ណាស់សម្រាប់ប្រទេសកម្ពុជាក្នុងការបង្កើតផលិតផលទេសចរណ៍ថ្មីៗបន្ថែមទៀត ដើម្បីទាក់ទាញភ្ញៀវទេសចរណ៍អន្តរជាតិ មកលេងកាន់តែច្រើនក្នុងប្រទេសកម្ពុជា ។
លោកស្រីបន្តថា “បើប្រៀបធៀបជាមួយនឹងប្រទេសជិតខាងយើង ពីមួយឆ្នាំ ទៅមួយឆ្នាំគេព្យាយាមបង្កើតតំបន់ទេសចរណ៍កាន់តែច្រើន ហើយសម្រាប់កម្ពុជាគួតែដល់ពេលវេលាដែលយើងត្រូវបង្កើតផលិតផលពិសេសៗបន្ថែមទៀត ដើម្បីទាក់ទាញភ្ញៀវទេសចរណ៍ឲ្យមកលេងបន្ថែមទៀត”។
លោកស្រីបន្ថែមថា ការបង្កើតនេះ គឺចង់អោយភ្ញៀវដែលមកលេង ហើយមកម្តងទៀតជាលើកទី ២ ឬទី ៣ ហើយនៅពេលពួកគេត្រឡប់មកវិញ មិនត្រឹមតែបានមកលេងកម្សាន្តដែលធ្លាប់មកលេងនៅផលិតផលដដែលទេ ថែមទាំងបានទៅលេងកម្សាន្តនៅទីកន្លែងដែលថ្មីៗជាច្រើនទៀត និងជួយជម្រុញឲ្យសេដ្ឋកិច្ចជាតិមានការរីកចម្រើនតាមរយៈភ្ញៀវទេសចរណ៍ទាំងនេះ។
