ដោយៈ គង់ សូរិយា
កណ្តាលៈ អ្នកជំនាញបានបង្ហើបឲ្យដឹងថា តំបន់ជុំវិញព្រលានយន្តហោះតេជោថ្មី ស្ថិតក្នុងខេត្តកណ្តាល មិនទាន់មានភាពទាក់ទាញអ្នកវិនិយោគដីធ្លីឡើងវិញនៅឡើយ។
លោកស៊ា ឆៃលីនអគ្គនាយកក្រុមហ៊ុនឆៃលីន ស៊ា រៀលធីបានមានប្រសាសន៍ឲ្យដឹង តាមបណ្តាញតេឡេក្រាម កាលពីថ្ងៃទី៧ ឧសភាកន្លងមកថា ទីផ្សារដីធ្លីហាក់មិនទាន់ មានការកំរើកឡើងវិញច្រើននៅឡើយ ជាក់ស្តែងតំបន់ជុំវិញព្រលានយន្តហោះថ្មី ស្ថិតនៅភាគខាងត្បូងរាជធានីភ្នំពេញ មានអ្នកដាក់លក់កាន់តែច្រើន ប៉ុន្តែមិនទាន់មានអ្នកវិនិយោគចាប់អារម្មណ៍នៅឡើយទេ។លោកបន្តថា “តម្លៃដីនៅជុំវិញតំបន់នេះ បើគិតប៉ែកមកខាងរាជធានីភ្នំពេញមានតម្លៃចន្លោះពី៥០ ទៅ៣០០ដុល្លារ ប៉ុន្តែបើគិតប៉ែកងាកទៅខាងស្រុកស្អាង មានតម្លៃចន្លោះពី៣០ទៅ៥០ដុល្លារ ក្នុងមួយម៉ែត្រការ៉េ”។
លោកស៊ា ឆៃលីនបានបន្តថា អ្នកវិនិយោគបច្ចុប្បន្នសម្លឹង និងស្វែងរកទីតាំងដី ដែលមានតម្លៃក្រោមទីផ្សារខ្លាំង និងជាប្រភេទដីដែលអាចសាងសង់អ្វីមួយ អាចដំណើរការអាជីវកម្មបាន។
ជាមួយគ្នានេះ លោកស្រីតាំង ហួរអគ្គនាយិកាក្រុមហ៊ុនAmatak Property Service Co, Ltdបានមានប្រសាសន៍ឲ្យដឹងផងដែរថា អ្នកវិនិយោគដីធ្លីនាពេលបច្ចុប្បន្ន ពួកគេសម្លឹងរកទីតាំង និងគោលដៅជាចម្បងថា ពួកគេទិញសម្រាប់ធ្វើអាជីវកម្មអ្វី ជាជាងវិនិយោគយកផលចំណេញ។
លោកស្រីបន្តថា “អ្នកវិនិយោគយកផលចំណេញ នៅតែមាន ប៉ុន្តែមិនមានចំនួនច្រើននោះទេ ហើយពួកគេនៅតែស្វែងរកអចលនទ្រព្យ ដែលមានតម្លៃល្អ”៕