ដោយៈ ស៊ីវ ម៉េង
ភ្នំពេញៈ អគ្គនាយកក្រុមហ៊ុនERA Cambodiaបានបង្ហើបថា ទីផ្សារខុនដូ ចាប់ផ្តើមបង្ហាញសញ្ញាវិជ្ជមានបណ្តើរៗហើយ ខណៈអ្នកវិនិយោគថ្មីៗចាប់ផ្តើមចូលមក។
លោកខន គង្គាបានមានប្រសាសន៍ឲ្យដឹងតាមបណ្តាញតេឡេក្រាមកាលពីថ្ងៃទី៧ ឧសភាថា បច្ចុប្បន្នអ្នកវិនិយោគជប៉ុន រុស្ស៊ី កូរ៉េ ភូមា និងអ្នកវិនិយោគមកពីបណ្តាប្រទេសអឺរ៉ុប បានចាប់ផ្តើមចូលមកកាន់ទីផ្សារនេះបណ្តើរៗហើយ។
លោកបន្តថា “វាមិនទាន់មានសញ្ញាភ្លូកទឹកភ្លូកដីនៅឡើយទេ តែវាកំពុងបង្ហាញសញ្ញាវិជ្ជមាន”។ លោកបន្ថែមថា “វាជាសញ្ញាល្អសម្រាប់ទីផ្សារខុនដូនៅកម្ពុជា”។
ការសិក្សាបានបង្ហាញថា នៅកម្ពុជាមានខុនដូប្រមាណ៦ម៉ឺនយូនីតបានដាក់ចូលទីផ្សារ ខណៈគំរោងមួយចំនួនទៀត មិនទាន់បានបញ្ចប់ការសាងសង់នៅឡើយ។
ខុនដូនៅកម្ពុជា បានក្លាយជាលំនៅដ្ឋានបែបស៊ីវិល័យថ្មីមួយ ក្នុងបរិបទថ្មីនៃសង្គមសេដ្ឋកិច្ចកម្ពុជា ដែលវាផ្តល់ឲ្យអ្នករស់នៅមានផាសុខភាព ជាមួយនឹងសុវត្ថិភាព មានសេវាកម្មចម្រុះ ដូចជា កន្លែងហាត់ប្រាណ ស្ទីម សោណា និងមានផ្សារទំនើបផងដែរ សម្រាប់គំរោងធំៗ ដែលបានអភិវឌ្ឍន៍ឡើង តាមបរិបទនៃការប្រកួតប្រជែង ក៏ដូចជា ការច្របាច់បញ្ចូលគ្នានូវបែបផែននៃការរស់នៅ និងការធ្វើពាណិជ្ជកម្ម៕