សម្តេចធិបតីៈរាជរដ្ឋាភិបាលនិតិកាលទី៧ដាក់ចេញគោលនយោបាយដើម្បីជួយកសិករនិងវិនិយោគលើវិស័យកសិកម្ម

សម្ដេចធិបតី ហ៊ុន ម៉ាណែតបន្តថា បច្ចុប្បន្ននេះ ដីធ្វើកសិ​កម្មកាន់តែថយ ទៅជាលំនៅឋាន ប្រែក្លាយទៅជាក្រុង ដែលរុញដល់វិស័យឧស្សាហ៍កម្ម និងទេសចរណ៍ផ្សេង ហើយការដាក់ចេញនូវ គោលនយោបាយរបស់រាជរដ្ឋាភិបាល នៅក្នុងការជួយដល់វិស័យកសិកម្មសំខាន់ណាស់ ការកសាងប្រព័ន្ធធារាសាស្ដ្រ អាងស្ដុកទឹក ហេដ្ឋារចនាសម្ព័ន្ធរូបវ័ន្ដ ផ្លូវតភ្ជាប់សម្រាប់ដឹកជញ្ជូន អគ្គិសនីជាដើម។

យុទ្ធសាស្ដ្ររបស់រាជរដ្ឋាភិបាល ក្នុងការជួយដល់វិស័យកសិកម្មឧស្សាហ៍កម្ម ដូចជា ស្រូវ អង្ករ កៅស៊ូ ស្វាយចន្ទី បានអនុវត្តច្រើននាពេលកន្លងទៅ។ ជាក់ស្ដែង គ្រាន់តែយុទ្ធសាស្ដ្រក្នុងការទាក់ទាញ អ្នកវិនិយោគមកពីក្រៅប្រទេស ដើម្បីប្រើប្រាស់វត្ថុធាតុដើម នៅក្នុងប្រទេសកម្ពុជា ក៏បានជួយមួយផ្នែកធំដល់ប្រជាកសិករផងដែរ។សម្តេចបញ្ជាក់។

ទាក់ទិនការងារវារីវប្បកម្មវិញ សម្ដេចធិបតី ហ៊ុន ម៉ាណែត លើកទឹកចិត្ត ឲ្យជំរុញវារីវប្បកម្មតាមគ្រប់រូបភាព ទាំងទឹកសាប និងសមុទ្រ ដោយលើកកម្ពស់ការស្រាវជ្រាវ បច្ចេកទេស បង្កា​ត់–ភ្ញាស់វារីសត្វកម្រ ដែលប្រឈមនឹងការផុតពូជ ដើម្បីអភិរក្ស និង កូនត្រីពូជដែលមានប្រសិទ្ធភាពសេដ្ឋកិច្ចខ្ពស់ ដើម្បីលើកកម្ពស់ជីវភាពវារីវប្បករផង និងកាត់បន្ថយ សម្ពាធមកលើធន​ធានជលផលធម្មជាតិផង។

សម្តេចធិបតី នាយករដ្ឋមន្ដ្រីនៃកម្ពុជា ក៏បានណែនាំឲ្យបង្កើ​នការត្រួតពិនិត្យគុណភាព សុវត្ថិភាព សមត្ថភាពកែច្នៃ និង ការអភិវឌ្ឍខ្សែច្រវាក់តម្លៃជលផល ដើម្បីពង្រឹងភាពប្រកួតប្រជែងរបស់ផលិតផល ជលផលកម្ពុជា ទាំងសម្រាប់ទីផ្សារក្នុងស្រុក និងក្រៅប្រទេស ហើយអំពាវនាវ និងលើកទឹកចិត្តឲ្យដៃគូអភិវឌ្ឍ និងវិស័យឯកជន ចូលរួមគាំទ្រឲ្យកាន់តែខ្លាំងថែមទៀត តាមរយៈការផ្តល់បច្ចេកទេស និងដើមទុន រួមទាំងហិរញ្ញប្បទានការប្រាក់ទាប ដើម្បីជំរុញវារីវប្បកម្ម និង ការកែច្នៃផល ផលិតផលជលផលកម្ពុជា។

បន្ថែមពីនេះ សម្តេចធិបតី ហ៊ុន ម៉ាណែត ណែនាំក្រសួងកសិកម្ម រុក្ខាប្រមាញ់ និងនេសាទ សហការជាមួយក្រសួងបរិស្ថាន ត្រូវបង្កើនការយកចិត្តទុកដាក់ ឲ្យកាន់តែខ្លាំងក្លាថែមទៀត ក្នុងការកាត់បន្ថយផលប៉ះពាល់បង្កឡើង ដោយការប្រែប្រួលអាកាសធាតុ ដើម្បីធានាចីរភាព និងនិរន្តរភាពនៃការអភិវឌ្ឍវិស័យកសិកម្ម៕