ដោយ: គង់ លាងហួរ
អន្តរជាតិ: ទីផ្សារលំនៅដ្ឋាននៅទីក្រុងញូវយ៉ក កំពុងឈា នដល់ចំណុចរបត់មួយ ខណៈការផ្គត់ផ្គង់បានដាំក្បាលចុះខ្លាំងបំផុតមិនធ្លាប់មាន ក្នុងរយៈពេលជាង៥ទសវត្សរ៍ ហើយវិបត្តិនេះ នឹងមានសភាពកាន់តែធ្ងន់ធ្ងរទៅៗ។
អត្រាចំនួនអាផាតម៉ិន ដែលគេទុកទំនេរចោលនៅទីក្រុងដ៏ធំរបស់សហរដ្ឋអាមេរិកមួយនេះ ស្ថិតក្នុងរង្វង់ត្រឹមតែ១,៤ភាគរយប៉ុណ្ណោះ ដែលការណ៍នេះកំពុងជំរុញ ឱ្យថ្លៃចំណាយលើការរស់នៅក្នុងទីក្រុងញូវយ៉ក ហក់ឡើងយ៉ាងគំហុក។
ក្រុមអ្នកជំនាញមិនបានបង្ហាញក្តីសង្ឃឹមថា វិបត្តិនេះនឹងបញ្ចប់ទៅវិញឆាប់រហ័សនោះទេ ព្រោះការដំឡើងអត្រាការប្រាក់របស់ធនាគារកណ្តាលអាមេរិក បានធ្វើឱ្យការអភិវឌ្ឍន៍អាផាតម៉ិន នៅទូទាំងសង្កាត់ទាំង៥ ក្នុងទីក្រុងញូវយ៉កថយចុះយ៉ាងខ្លាំង។
យោងតាមទិន្នន័យពីនាយកដ្ឋាន គ្រប់គ្រងអគារទីក្រុងញូវយ៉ក បានបង្ហាញឱ្យដឹងថា “កាលពីខែមិថុនាកន្លងទៅ អ្នកអភិវឌ្ឍន៍ បានដាក់ពាក្យស្នើសុំលិខិតអនុញ្ញាត សាងសង់អាផាតម៉ិនថ្មី ចំនួន៣៦ច្បាប់ប៉ុណ្ណោះ ដែលនេះជាកម្រិតទាបបំផុតក្នុងរយៈពេលមួយទសវត្សរ៍កន្លងមក។
ចំណែក កាលពីឆ្នាំ២០២៣ រដ្ឋាភិបាលអាមេរិកបានផ្តល់លិខិតអនុញ្ញាតសាងសង់អាផាតម៉ិនថ្មី ប្រហែល១៥.៥០០ច្បាប់ ដែលជាចំនួនទាបបំផុត គិតចាប់តាំងពីឆ្នាំ២០១៦មក។ នេះបើយោងតាមការបញ្ជាក់ឱ្យដឹង ពីនាយកដ្ឋានផែនការទីក្រុងញូវយ៉ក។
បញ្ហាកង្វះការផ្គត់ផ្គង់ បានបង្កឱ្យមានវិបត្តិលំនៅដ្ឋាននៅទីក្រុងញូវយ៉ក ខណៈតម្លៃផ្ទះជួលបានហក់ឡើង៣៣% ក្នុងឆ្នាំនេះ បើធៀបនឹងកម្រិតមុនផ្ទុះជំងឺរាតត្បាត ហើយតម្លៃផ្ទះជាមធ្យម សម្រាប់ដាក់លក់បានកើនឡើង២៤ភាគរយ។
ជាមួយគ្នានេះដែរ ការសាងសង់អគារយឺតយ៉ាវ ក៏បានធ្វើឱ្យកង្វះខាតលំនៅដ្ឋាន នៅក្នុងទីក្រុងញូវយ៉ក កាន់តែមានស្ថានភាពអាក្រក់ទៅៗផងដែរ៕ប្រភព: Bloomberg៕
