ភ្នំពេញៈ អ្នកជំនាញបានលើកឡើងថា ស្ថានភាពទីផ្សារអចលនទ្រព្យ ពិសេសដីធ្លីនៅមិនទាន់កើនឡើងនៅឡើយទេ ស្របពេលលំហូរទុនវិនិយោគ ផ្ទាល់ពីបរទេសនៅមានកម្រិត។
អគ្គនាយកក្រុមហ៊ុនAdvance Real Estate លោកប៉ូ អ៊ាវគង់បានមានប្រសាសន៍ឲ្យដឹងកាលពីចុងសប្តាហ៍មុនថា រហូតមកទល់ពេលនេះ បើយើងសង្កេតនៅក្នុងទិដ្ឋភាពជំនួញ និងលំហូរវិនិយោគ យើងឃើញថា មិនទាន់ទុនណាមួយត្រូវបានចាក់ចូលក្នុងវិស័យអចលនទ្រព្យ ឲ្យមានការប្រែប្រួលនៅឡើយទេ។ 
លោកបន្តថា “តាមពិតនៅតាមបណ្តាខេត្ត វាមានបញ្ហាប្រឈមមួយខ្ពស់ជាងរាជធានីភ្នំពេញ ក៏ដូចជាតំបន់ជុំវិញ ព្រោះស្ថានភាពនៃការទិញ លក់ដីនៅតាមបណ្តាខេត្ត មានការ ធ្លាក់ចុះខ្លាំង”។ លោកបន្តថា “ក្នុងករណីមានការលក់ប្រញាប់ ដោយពាក់ព័ន្ឋធនាគារជាដើម គឺអាចមានការលក់បាន ក្នុងករណីអចលនទ្រព្យ មានតម្លៃក្រោមទីផ្សារខ្លាំង”។
លោកប៉ូ អ៊ាវគង់បានបន្តថា ចរន្តនៃការវិនិយោគនៅតាមច្រកព្រំដែន មានសកម្មភាពតិចតួច ប៉ុន្តែមិនទាន់មានការកើនឡើងតម្លៃដីធ្លីនៅឡើយទេ។ លោកបន្តថា មានការរកដីសាងសង់កាស៊ីណូ នៅទីក្រុងបាវិត និងនៅតំបន់ដាក់ដាំក្នុងខេត្តមណ្ឌលគិរី ប៉ុន្តែវាមិនមានចលនា ជាដុំកំភួនច្រើននៅឡើយទេ។
