ដោយ: គង់ លាងហួរ
អន្តរជាតិ: ទីក្រុងហុងកុង គឺជាមជ្ឈមណ្ឌលហិរញ្ញវត្ថុដ៏ធំបំផុតមួយនៅលើពិភពលោក និងជាទីក្រុងទនើបប្រណីត ដែ លភ្ញៀវទេសចរណ៍គ្រប់រូប ប្រាថ្នាចង់ទៅទស្សនា ខណៈទីក្រុងមួយនេះ ពោរពេញទៅដោយអគារខ្ពស់កប់ពពក ដែលបង្អួតភាពទាក់ទាញទៅកាន់ពិភពលោកផងដែរ។]
តួយ៉ាង អគារមជ្ឈមណ្ឌលពាណិជ្ជកម្មអន្តរជាតិ (International Commerce Center) ស្ថិតក្នុងតំបន់ West Kowloon នៃទីក្រុងហុងកុងមានកំពស់៤៨៤ម៉ែត្រ និង១០៨ជាន់។អគារពាណិជ្ជកម្មនេះ ត្រូវបានចាប់ផ្តើមសាងសង់ឡើងកាលពីឆ្នាំ២០០២ និងសាងសង់បញ្ចប់ ព្រមទាំងបានបើកដាក់ឱ្យប្រើប្រាស់ជាផ្លូវការ នៅក្នុងឆ្នាំ២០១០ ដោយចំណាយទុនវិនិយោគអស់៥,១ពាន់លានដុល្លារអាមេរិក។
-->
អគារមជ្ឈមណ្ឌលពាណិជ្ជកម្មមួយនេះ គឺជាផ្នែកមួយនៅក្នុងគម្រោងអចលនទ្រព្យពហុមុខងារ Union Square ។ បច្ចុប្បន្ន អគារInternational Commerce Centre នេះ គឺជាអគារខ្ពស់ជាងគេ នៅតំបន់រដ្ឋបាលពិសេសហុងកុង និងធ្លាប់ជាប់ឈ្មោះជាអគារខ្ពស់ជាងគេលំដាប់៣ នៅតំបន់អាស៊ីកាលពីឆ្នាំ២០១០។
អគារស្ថាបត្យកម្មដ៏អច្ឆរិយៈនេះ រួមមានសណ្ឋាគារលំដាប់ផ្កាយ៥ The Ritz-Carton ការិយាល័យពាណិជ្ជកម្ម និងមានកន្លែងទស្សនាទេសភាពផ្ទៃមេឃ “Sky100” ក្នុងទីក្រុងហុងកុងថែមទៀតផង។ ជណ្តើរយន្តនៅក្នុងអគារនេះ មានល្បឿនលឿនបំផុតប្រមាណ៩ម៉ែត្រក្នុងមួយវិនាទី។
ការជួលការិយាល័យ នៅក្នុងអគារដ៏ប្រណីតនេះ មានតម្លៃចាប់ពី១០,២៤ដុល្លារអាមេរិក ទៅ១១,៧៨ដុល្លារអាមេរិកក្នុងមួយហ្វីតការ៉េក្នុងមួយខែ ខណៈថ្លៃចំណាយលើសេវាកម្មមានតម្លៃប្រមាណ១,៣៧ដុល្លារប៉ុណ្ណោះ ក្នុងមួយហ្វីតការ៉េ។
ចំណែក ការស្នាក់នៅសណ្ឋាគារThe Ritz-Carton ដែលមានទីតាំងនៅជាន់ទី១០២ នៃអគារInternational Commerce Centre មានតម្លៃប្រមាណ៤៣៦ដុល្លារអាមេរិក ក្នុងមួយយប់់។នេះបើយោងតាមវេទិកាអនឡាញ Booking. Com។
មជ្ឈមណ្ឌលពាណិជ្ជកម្មអន្តរជាតិនេះ ត្រូវបានអភិវឌ្ឍន៍ដោយក្រុមហ៊ុនអចលនទ្រព្យ Sun Hung Kai Properties ដោយសហការជាមួយក្រុមហ៊ុន Hennderson Land។ ក្រុមហ៊ុនទាំងពីរនេះ គឺជាប្រតិបត្តិកររថភ្លើងក្រោមដី (Metro) របស់ទីក្រុងហុងកុង និងជាក្រុមហ៊ុនអភវិឌ្ឍន៍អចលនទ្រព្យដ៏ធំ និងល្បីល្បាញបំផុត ខាងសាងសង់អគារខ្ពស់កប់ពពក៕ប្រភព: Kayak.Com & JLL៕
