ដោយ: គង់ លាងហួរ
បាងកក: ក្រុមហ៊ុនប្រឹក្សាអចលនទ្រព្យ Property DNA បានលើកឡើងថា ចំនួនក្រុមហ៊ុនដែលផ្តល់មូលនិធិដោយក្រុមអ្នកវិនិយោគចិនកំពុងកើនឡើង ខណៈពួកគេបានទិញអចលនទ្រព្យ នៅក្នុងទីក្រុងសេដ្ឋកិច្ចសំខាន់ៗ របស់ប្រទេសថៃ សម្រា ប់ជួល និងលក់បន្ត(resale) ដើម្បីស្វែងរកផលចំណេញនាពេលក្រោយ។
ផែនការរបស់រដ្ឋាភិបាលថៃ នៅក្នុងការបង្កើនរយៈពេលជួលដីសម្រាប់ជនបរទេសពី៥០ឆ្នាំ ទៅដល់៩៩ឆ្នាំ និងបង្កើនកូតាកម្មសិទ្ធិរបស់ជនបរទេស នៅក្នុងគម្រោងខុនដូដល់៧៥% ត្រូវបានក្រុមអ្នកជំនាញរំពឹងថា នឹងជួយជំរុញបន្ថែមទៀតនូវនិន្នាការនេះ។
លោក Surachet Kongcheep នាយកគ្រប់គ្រងរបស់ក្រុមហ៊ុន Property DNA បានមានប្រសាសន៍ឱ្យដឹងថា “ក្រុមហ៊ុនចិនទាំងនេះ ត្រូវបានបង្កើតឡើងក្រោមច្បាប់ថៃ ឬតាមរយៈការបណ្តាក់ទុនរួមគ្នាជាមួយដៃគូថៃ។ ពួកគេបាននិងកំពុងប្រើប្រាស់មូលនិធិវិនិយោគពីប្រទេសចិន ដើម្បីទិញខុនដូ និងផ្ទះនៅក្នុងទីក្រុងធំៗ” ។
លោកបានបន្ថែមថា “វិនិយោគិនចិន មានគោលបំណងលក់ ឬជួលអចលនទ្រព្យទាំងនេះ ជាបន្តទៅឱ្យជនជាតិថៃដែលមានទ្រព្យសម្បត្តិហូរហៀរ ឬជនបរទេសនៅពេលក្រោយ ជាពិសេសអ្នកចូលចិត្តស្វែងរក លំនៅដ្ឋានក្នុងទីក្រុងបាងកក ទីក្រុងប៉ាតាយ៉ា និងកោះភូកេត”។
ក្រុមហ៊ុនប្រឹក្សាអចលនទ្រព្យ Property DNA បានប៉ាន់ប្រមាណថា បណ្តាក្រុមហ៊ុនដែលផ្តល់មូលនិធិ ដោយអ្នកវិនិយោគចិន បានបោះទុនជាង១០០ពាន់លានបាត នៅក្នុងទីក្រុងទាំង៣ខាងលើ ក្នុងរយៈពេល១៥ឆ្នាំកន្លងមក។
លោក Surachet បានបន្ថែមថា អ្នកវិនិយោគចិននឹងសម្រុ កចូលមក ក្នុងទីផ្សារអចលនទ្រព្យថៃកាន់តែច្រើន ដើម្បីឆក់ឱកាសទិញអចលនទ្រព្យ ដើម្បីលក់ ឬជួលបន្ត នៅពេលឱកាសចំណេញមកដល់ ប្រសិនបើផែនការបង្កើនរយៈពេលជួលដី និងកូតាកម្មសិទ្ធិខុនដូ ដល់ជនបរទេសត្រូវបានអនុម័ត។
គិតត្រឹមឆមាសទី១ ឆ្នាំ២០២៤ ខុនដូនៅទីក្រុងបាងកកដែលមានក្នុងស្តុក មានចំនួន៤៨៦.៤២០យូនីត។ អត្រានៃការលក់ខុនដូមុន(pre-sale) សរុបបានកើនឡើងដល់៥៩,៥% នៅក្នុងឆមាសទី១ ឆ្នាំ២០២៤ បើធៀបនឹង៥៧,៥% នៅក្នុងឆមាសទី២ ឆ្នាំ២០២៣។ នេះបើយោងតាមក្រុមហ៊ុនប្រឹក្សាអចលនទ្រព្យ Cushman&Wakefield។
នៅឆមាសទី១ ខុនដូសម្រាបដាក់លក់ នៅរាជធានីបាងក ក មានតម្លៃជាមធ្យមចំនួន១៥៨.៤៨៦បាត (ប្រហែល៤.៤៦៨ដុល្លារ)ក្នុងមួយម៉ែត្រការ៉េ ធ្លាក់ចុះ៣,៥% បើប្រៀបធៀបទៅនឹងកម្រិតនៅឆមាសទី២ ឆ្នាំ២០២៣៕ប្រភព: The Nation ៕
