ដោយ: គង់ លាងហួរ
អន្តរជាតិ: ធនាគារវិនិយោគខ្នាតយក្ស JPMorgan Chase & Co ព្យាករណ៍ឃើញនូវឱកាសចំនួន៣៥ភាគរយ ដែលសហរដ្ឋអាមេរិក អាចធ្លាក់ចូលវិបត្តិសេដ្ឋកិច្ចនៅចុងឆ្នាំនេះ បើធៀបនឹងឱកាស២៥%គិតត្រឹមដើមខែមុន។
ក្រុមសេដ្ឋវិទូរបស់ធនាគារ JPMorgan ដឹកនាំដោយដោយលោក Bruce Kasman លើកឡើងថា ទិន្នន័យពត៌មានសេដ្ឋកិច្ចរបស់សហរដ្ឋអាមេរិក បានបង្ហាញពីការដាំក្បាលចុះលើសពីការរំពឹងទុក នៃតម្រូវការការងារ និងទីផ្សារកម្លាំងពលកម្ម។
ស្របពេលដែលសម្ពាធ អត្រាអតិផរណារបស់សហរដ្ឋអាមេរិកកំពុងបន្តធ្លាក់ចុះ ក្រុមសេដ្ឋវិទូJPMorgan ព្យាករណ៍ថា ធនាគារកណ្តាលអាមេរិក (Fed) នឹងកាត់បន្ថយអត្រាការប្រាក់ចំនួន២លើក នៅក្នុងឆ្នាំ២០២៤ ដោយនៅខែកញ្ញាមួយលើក និងខែវិច្ឆិកាមួយលើកទៀត។
ក្រុមសេដ្ឋវិទូរបស់ធនាគារ JPMorgan បានសរសេរនៅក្នុងរបាយការណ៍របស់ខ្លួនថា ការធ្លាក់ចូលវិបត្តិសេដ្ឋកិច្ចរបស់សហរដ្ឋអាមេរិក នឹងប្រាកដជាបង្ខំឱ្យធនាគារកណ្តាលនានាលើពិភពលោក បន្ធូរបន្ថយគោលនយោបាយរូបិយវត្ថុ របស់ពួកគេយ៉ាងប្រញាប់ប្រញាល់។
ការព្យាករណ៍ថ្មីរបស់ធនាគារ JPMorgan លើហានិភ័យចំពោះវិបត្តិសេដ្ឋកិច្ចអាមេរិក មានភាពស្រដៀងគ្នានឹងការព្យាករណ៍របស់ធនាគារ Goldman Sachs ដែលមើលឃើញឱកាសចំនួន២៥% នៃការផ្ទុះឡើងវិបត្តិសេដ្ឋកិច្ចអាមេរិក នៅឆ្នាំ២០២៥។
អត្រាអ្នកគ្មានការងារធ្វើ នៅសហរដ្ឋអាមេរិកបានកើនឡើងដល់៤,៣ភាគរយ នៅក្នុងខែកក្កដា ហើយការជួលបុគ្គលិកបានធ្លាក់ចុះ។ ការណ៍នេះ បានបង្កឱ្យបណ្តាវិនិយោគិនសកល មានការព្រួយបារម្ភអំពីហានិភ័យ នៃការផ្ទុះវិបត្តិសេដ្ឋកិច្ច។
យោងតាមការិយាល័យស្ថិតិការងារ បានរាយការណ៍ថា អាមេរិកបានបង្កើត ការងារបន្ថែមចំនួន១១៤.០០០កន្លែង កាលពីខែកក្កដា។ ចំនួននេះបង្ហាញសញ្ញា ពីការធ្លាក់ចុះយ៉ាងគំហុក បើធៀបនឹងការបង្កើតការងារ ចំនួន២៦០.០០០កន្លែងនៅក្នុងខែមិថុនា៕ប្រភព: The edge Malaysia៕
