ដោយៈ គង់ សូរិយា
ភ្នំពេញៈ លោក លី សុខឆាយ អគ្គនាយកក្រុមហ៊ុន LSCG Group បានប្រកាសសហការជាមួយក្រុមហ៊ុនអាមេរិក និងសិង្ហបុរី (JV) បោះទុន១៦៨លានដុល្លារ ដើម្បីបន្តអភិវឌ្ឍន៍សាងសង់សំណង់អគារ ដែលកំពុងជាប់គាំងនៅក្រុងព្រះសីហនុ។
លោកអគ្គនាយកក្រុមហ៊ុន LSCG Group បានគូសបញ្ជាក់ឲ្យដឹងតាមទូរស័ព្ទកាលពីរសៀលថ្ងៃទី៩ សីហាកន្លងមកថា ក្រុមហ៊ុនបាននឹងកំពុងស្វែងរកសំណង់អគារ និងទីតាំងដីដែលស្ថិតនៅទីតាំងអាទិភាពមួយចំនួន ដើម្បីធ្វើការវិនិយោគអភិវឌ្ឍបន្ត។
លោកបន្តថា មុននឹងឈានដល់ការសម្រេច ខាងលើនេះ ក្រុមហ៊ុន LSCG Group និងដៃគូបានជួបប្រជុំជាមួយថ្នាក់ដឹកនាំ និងគណៈអភិបាលក្រុងព្រះសីហនុ ជាច្រើនលើកជាច្រើនសាររួចមកហើយ ដោយបានចំណាយពេលជាច្រើនឆ្នាំហើយដែរ។
លោកបន្តថា “យើងបានសិក្សាគម្រោងប្លង់មេ (Master Plan) និងលើកសំណើរជូនរាជរដ្ឋាភិបាល ក្នុងការរៀបចំ Master Plan ក្រុងព្រះសីហនុ ដោយបានចំណាយទាំងពេលវេលា និងធនធានផ្ទាល់ខ្លួន ខណៈគម្រោងទាំងនោះរួមមានការវិនិយោគទីក្រុងវៃឆ្នាត ធ្វើទំនើបកម្មក្រុងព្រះសីហនុទាំងមូល គម្រោងទឹកស្អាត និងគម្រោងគ្រប់គ្រងទឹកកង្វក់ក្នុងទីក្រុង”។
លោកលី សុខឆាយបានបន្ថែមថា ស្របតាមគោលនយោបាយរបស់រាជរដ្ឋាភិបាលអាណ្ណត្តិថ្មី ដែលចង់ដោះស្រាយ និងជួយសម្រួលបញ្ហាអគារជាប់គាំង នៅក្រុងព្រះសីហនុ ដូច្នេះក្រុមហ៊ុន LSCG សូមចូលរួមចំណែក ក្នុងការដោះស្រាយបញ្ហាខាងលើ ដោយរួមសហការជាមួយដៃគូ ដើម្បីជួយជំរុញគម្រោងអចលនទ្រព្យ និងគម្រោងថ្មីៗកំពុងសិក្សា ជាពិសេសអគារដែលកំពុងជាប់គាំង ដើម្បីបន្តសង់បញ្ចប់ជាជាងទុកចោលក្នុងលក្ខណៈអគារសំណល់បែបនេះ។
ព័ត៌មានបន្ថែម សូមទំនាក់ទំនងមកកាន់លេខរដ្ឋបាលយើងខ្ញុំដូចខាងក្រោម៖។ លេខ Telegram +៨៥៥ ១០ ៨០៤ ៨០៤ ឬមកកាន់ទីតាំងការិយាល័យនៅ វីឡាទោល A លេខ ០៣ ផ្លូវលេខ ០៩ បុរីប៉េងហួតបឹងស្នោ ឬនៅការិយាល័យក្នុងសណ្ឋាគារផ្កាយ៥ Prince Times ក្រុងព្រះសីហនុ៕
