ដោយ: គង់ លាងហួរ
អន្តរជាតិ: ប្រទេសម៉ាឡេស៊ីកំពុងជួបប្រទះនិន្នាការនៃការកើនឡើងគួរឱ្យកត់សម្គាល់នៅក្នុងការសាកសួរពីសំណាក់ជនជាតិចិនអំពីការទិញផ្ទះ ដើម្បីស្វែងរកផលចំណេញលើការវិនិយោគនាពេលអនាគត។
កាសែត The Straits Times បានរាយការណ៍ថា ពលរដ្ឋចិនបង្ហាញការចាប់អារម្មណ៍លើការវិនិយោគអចលនទ្រព្យ ជាពិសេសនៅក្នុងតំបន់ទីក្រុងគូឡាឡាំពួរ ដូចជាតំបន់ពាណិជ្ជកម្មកណ្តាល (CBD)និងតំបន់ធំៗដូចជា តំបន់Bukit Damansara តំបន់Bangsar និងតំបន់Kenny Hills។
យោងតាមក្រុមហ៊ុនប្រឹក្សាអចលនទ្រព្យ Juwai IQI បានឱ្យដឹងថា លំនៅដ្ឋានប្រណីតនៅក្នុងប្រទេសម៉ាឡេសុី ដែលមានតម្លៃចាប់ពី១លាងរីងហ្គីត(ប្រហែល២២៦.៧១៥ដុល្លារអាមេរិក) កំពុងមានតម្រូវការខ្ពស់។
តួលេខខាងលើនេះមានតម្លៃថ្លៃជាងជិត២ដង បើប្រៀបធៀបនឹងតម្លៃជាមធ្យមនៃអាផាតមុិនថ្មីចំនួន៥៨២.៨៨៧រីងហ្គីត(ប្រហែល១៣១.២១៤ដុល្លារ)ក្នុងមួយយូនីត។នេះបើយោងតាមរបាយការណ៍របស់ក្រុមហ៊ុន Global proptech។
លោក Kashif Ansari នាយកប្រតិបត្តិក្រុមហ៊ុន Juwai IQI បានថ្លែងប្រាប់កាសែត The Strait Times ថា “ចំនួននៃការសាកសួរពីជនជាតិចិនលើការទិញផ្ទះនៅម៉ាឡេសុីនៅក្នុងត្រីមាសទី១ ឆ្នាំ២០២៤មានការកើនឡើង៤២ភាគរយ បើប្រៀបធៀបនឹងត្រីមាសទី៤ ឆ្នាំមុន”។
លោកបានបន្ថែមថា “បច្ចុប្បន្ន ពលរដ្ឋចិនជាចំណែកធំបំផុតនៃប្រភពជនបរទេសដែលបានទិញផ្ទះនៅប្រទេសម៉ាឡេស៊ី ហើយពួកគេផ្ដោតលើអចលនទ្រព្យនៅទីក្រុងគូឡាឡាំពួ និងរដ្ឋ Johor ក្បែរប្រទេសសិង្ហបុរី ដែលមានតម្លៃចំនួន២លានរីងហ្គីត”។
ការចាប់អារម្មណ៍ដាក់ទុនវិនិយោគលើអចលនទ្រព្យនៅម៉ាឡេស៊ីនៅតែមានកម្រិតខ្ពស់ ថ្វីបើក្រុមអ្នកវិនិយោគចិនមួយចំនួនកំពុងលក់អចលនទ្រព្យនៅក្រៅប្រទេស ដោយសារតែការកើនឡើងថ្លៃកម្ចីទិញផ្ទះ និងការធ្លាក់ចុះនៃសេដ្ឋកិច្ចចិនយ៉ាងណាក្តី៕
ប្រភព: Malay Mail
