ដោយ: គង់ លាងហួរ
អន្តរជាតិ: ការនាំចេញរបស់ប្រទេសកូរ៉េខាងត្បូងកំពុងកើនឡើងជាលំដាប់ រហូតនាំឱ្យក្រុមជំនាញរំពឹងទុកថា កូរ៉េខាងត្បូងអាចនឹងវ៉ាដាច់ការនាំចេញរបស់ប្រទេសជប៉ុនជាលើកដំបូងនៅក្នុងឆ្នាំ២០២៤នេះ។
គម្លាតទំហំទឹកប្រាក់នៃការនាំចេញរវាងប្រទេសទាំងពីរ បានធ្លាក់ចុះដល់កម្រិតទាបបំផុតចំនួន៣,៥ពាន់លានដុល្លារនៅក្នុងឆមាសទីមួយឆ្នាំនេះ បើធៀបនឹងគម្លាតចំនួន១៦០ពាន់លានដុល្លារក្នុងឆ្នាំ២០១៨ និង៨៥ពាន់លានដុល្លារក្នុងឆ្នាំ២០២៣។
ការបង្រួមគម្លាតកាន់តែតូចបែបនេះកើតមានឡើង ស្របពេលការនាំចេញទំនិញរបស់កូរ៉េខាងត្បូងទៅក្រៅប្រទេសកំពុងមានការកើនឡើង។ចំណែកការនាំចេញរបស់ប្រទេសជប៉ុនបានស្ថិតនៅទ្រឹង។
ជាក់ស្ដែង ការនាំចេញទំនិញរបស់ប្រទេសកូរ៉េខាងត្បូងក្នុងរយៈពេល៦ខែដំបូងដើមឆ្នាំនេះសម្រេចបានទំហំទឹកប្រាក់ចំនួន៣៣៤,៨ពាន់លានដុល្លារ កើនឡើង៩ភាគរយធៀបនឹងឆ្នាំមុន។
ផ្ទុយទៅវិញ ការនាំចេញទំនិញរបស់ប្រទេសជប៉ុនទៅកាន់ទីផ្សារអន្តរជាតិបានធ្លាក់ចុះ៣,៦ភាគរយមកនៅត្រឹមទំហំទឹកប្រាក់ចំនួន៣៣៨,៣ពាន់លានដុល្លារអាមេរិក។
គិតត្រឹមខែកក្កដា ការនាំចេញរបស់កូរ៉េខាងត្បូងបានបន្តកើនឡើងរយៈពេល១១ខែជាប់ៗគ្នា ខណៈការនាំចេញទៅក្រៅប្រទេសក្នុងខែកក្កដាបានកើនឡើង១៣,៩ភាគរយដល់៥៧,៤ពាន់លានដុល្លារ។នេះបើយោងតាមទិន្នន័យពីក្រសួងពាណិជ្ជកម្ម ឧស្សាហកម្ម និងថាមពលកូរ៉េ។
លោក Lee Ji-pyeong សាស្ត្រាចារ្យនៅសាកលវិទ្យាល័យ Hankuk University of Foreign Studies បានលើកឡើងថា “នៅក្រោមកាលៈទេសៈខាងលើនេះ ប្រទេសកូរ៉េខាងត្បូងពិតជាមានឱកាសវ៉ាដាច់ប្រទេសជប៉ុនក្នុងការនាំចេញ”។
លោកបានកត់សម្គាល់ថា ការនាំចេញរបស់កូរ៉េអាចនឹងបំបែកកំណត់ត្រាក្នុងទំហំទឹកប្រាក់ចំនួន៧០០ពាន់លានដុល្លារនៅឆ្នាំនេះ ខណៈការនាំចេញរបស់ជប៉ុនបាននិងកំពុងបន្តធ្លាក់ចុះ បន្ទាប់ពីហក់ឡើងដល់កម្រិតកំពូលចំនួន៨២៣,៦ពាន់លានដុល្លារក្នុងឆ្នាំ២០១១។
ទាក់ទងនឹងតារាងវាយតម្លៃចំណាត់ថ្នាក់លើបណ្តាប្រទេសនាំចេញច្រើនជាងគេរបស់ពិភពលោក កូរ៉េខាងត្បូងបានស្ថិតក្នុងចំណាត់ថ្នាក់ទី១២កាលពីឆ្នាំ២០០៨ ហើយបន្ទាប់មក កូរ៉េបានបោះជំហានឡើងទៅកាន់ចំណាត់ថ្នាក់លេខ៧ ក្នុងឆ្នាំ២០១០ និងបន្តឈានឡើងដល់ចំណាត់ថ្នាក់លេខ៦ ក្នុងឆ្នាំ២០១៥។
ទន្ទឹមនឹងនេះ ប្រទេសជប៉ុននៅតែបន្តស្ថិតក្នុងចំណាត់ថ្នាក់លេខ៥ជាប់រហូត ចាប់តាំងពីឆ្នាំ២០១៩ បន្ទាប់ពីជប៉ុនត្រូវបានវ៉ាដាច់ដោយប្រទេសហូឡង់ក្នុងឆ្នាំតែមួយនោះ៕
ប្រភព: Korea Times
