ដោយៈគង់ សូរិយា
ភ្នំពេញៈ ស្របពេលមានការដោះដូរ រដ្ឋមន្រ្តីក្រសួងទេសចរណ៍ថ្មី បញ្ហានៅក្នុងវិស័យនេះ ទាមទារឲ្យមានការប្តេជ្ញាចិត្តខាងនយោបាយ និងទទួលយកចំណុចខ្វះខាត ដើម្បីកែលម្អ និងបង្កើតឱកាសឡើងវិញ។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោកធូន ស៊ីណានបានមានប្រសាសន៍ប្រាប់សារព័ត៌មានធំមួយចំៗថា ការដោះដូរសមាសភាពនៃរាជរដ្ឋាភិបាល គឺជាកាតព្វកិច្ចរបស់នាយករដ្ឋមន្ត្រី ក្នុងការចាត់ចែងទៅតាមស្ថានភាពជាក់ស្ដែង។់
លោកបញ្ជាក់ថា “បញ្ហានៅក្នុងវិស័យទេសចរណ៍ នៅកម្ពុជាបច្ចុប្បន្ននេះ មិនមែនជារឿងសាមញ្ញទេ ហើយគ្រប់គ្នាត្រូវហ៊ានឆ្លុះបញ្ចាំង ពីចំណុចខ្សោយរបស់ខ្លួន ហ៊ានទទួលយក ហើយរកឱកាសអភិវឌ្ឍចំណុចខ្សោយនោះឲ្យប្រសើរឡើង”។
លោកធួន ស៊ីណានបានបន្តថា បើសិនទាំងអស់គ្នាមិនទទួលយកចំណុចខ្វះខាតរបស់យើងទេ ហើយនៅតែស្រែកថាយើងខ្លាំង យើងពូកែ យើងមានអ្វីគ្រប់យ៉ាង យើងល្អជាងគេ យើងមិនបាចមើលគេ នោះយើងនឹងនៅបន្តការលំបាកដោយមិនដឹងខ្លួន ហើយកាន់តែរីងខ្លួនពីមួយថ្ងៃទៅមួយថ្ងៃ។
លោកបញ្ជាក់ថា “ខ្ញុំសូមលើកទឹកចិត្តថា មិនថារដ្ឋមន្ត្រីណា មិនថាបុគ្គលណា មានស្នាដៃឬបទពិសោធន៍យ៉ាងណាមកទេ ចាំបាច់ណាស់ត្រូវតែហ៊ាន ទទួលស្គាល់នូវតថភាព ដែលកំពុងកើតឡើង”។ លោកបន្ថែមថា “នៅពេលយើងវិភាគរកចំណុចខ្លាំង និងចំណុចខ្សោយ យើងត្រូវទុករឿងនយោបាយមួយដុំសិន កុំយកវាមកលូកលាន់។ បើរកឃើញចំណុចខ្លាំងនិងខ្សោយឃើញហើយ យើងត្រូវហ៊ានកែចំណុចខ្សោយរបស់យើងឱ្យទៅជាឱកាស”។
កាលពីថ្ងៃទី២០ ខែកញ្ញាកន្លងមកនេះ រដ្ឋសភាបោះឆ្នោតផ្ដល់សេចក្ដីទុកចិត្ត សម្រាប់ការកែសម្រួលឲ្យលោក ហួត ហាក់ ពីរដ្ឋមន្ត្រីក្រសួងអធិការកិច្ច ទៅជារដ្ឋមន្ត្រីក្រសួងទេសចរណ៍ ហើយរដ្ឋមន្ត្រីទេសចរណ៍ សុខ សូកេន ក្លាយជារដ្ឋមន្ត្រីក្រសួងអធិការកិច្ចវិញ៕
