ដោយៈ គង់ សូរិយា
ភ្នំពេញៈ ក្រសួងបរិស្ថាន បាននិងកំពុងអភិវឌ្ឍគោលដៅលំហែបៃតង នៅតាមសហគមន៍តំបន់ការពារធម្មជាតិ ស្របតាមគោលនយោបាយ និងយុទ្ធសាស្រ្តរបស់រាជរដ្ឋាភិបាលកម្ពុជា។
អ្នកនាំពាក្យក្រសួងបរិស្ថាន លោកខ្វែ អាទិត្យាបានមានប្រសាសន៍ឲ្យដឹងកាលពីពេលថ្មីៗនេះថា នៅកម្ពុជាមានសហគមន៍ធម្មជាតិចំនួន៥០ ដែលបានចងក្រងឡើង ក្នុងនោះសហគមន៍ចំនួន៣០ បាននិងកំពុងបង្កើតផលចំណូល ពីភ្ញៀវទេសចរណ៍ជាតិ អន្តរជាតិដោយខ្លួនឯង។
នៅក្នុងយុទ្ធសាស្រ្តចក្រាវិស័យបរិស្ថាន បានកំពុងធ្វើឱ្យសហគមន៍មានចំណូលបន្ថែម និងបង្កើតជម្រើសថ្មី សម្រាប់ការប្រកបមុខរបរចិញ្ចឹមជីវិត ដោយផ្តល់ចំណេះដឹង ជំនាញ និងមុខរបរថ្មី។ ក្នុងនោះរួមមាន ការចិញ្ចឹមសត្វ ការដាំដំណាំរួមផ្សំផ្សេងទៀត សម្រាប់ប្រើប្រាស់ប្រចាំថ្ងៃផង និងសម្រាប់លក់នៅលើទីផ្សារផងដែរ ព្រមទាំងជួយរៀបចំ បង្កើតជាអេកូទេសចរណ៍ នៅក្នុងតំបន់សហគមន៍។
ទាក់ទងទៅនឹងវិស័យទេសចរណ៍ធម្មជាតិ ក្នុងខេត្តសៀមរាបនេះផងដែរ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា បានផ្តល់ជូននូវដំណោះស្រាយមួយចំនួន នៅសហគមន៍ទេសចរណ៍ធម្មជាតិកំពង់ភ្លុក ក្នុងស្រុកប្រាសាទបាគង បន្ទាប់ពីបានចុះទៅពិនិត្យស្ថានភាព និងទស្សនាតំបន់ទេសចរណ៍ធម្មជាតិនេះ នាថ្ងៃទី១ ធ្នូនេះ។
យោងតាមបណ្តាញសង្គមផ្លូវការ របស់ប្រមុខរដ្ឋាភិបាលបានឱ្យដឹងថា បន្ទាប់ពីបានទស្សនកិច្ច និងជួបសំណេះសំណាលផ្ទាល់ជាមួយសហគមន៍ ជាពិសេស អ្នកប្រកបរបរជាអ្នកបើកបរកាណូត និងអុំទូកបម្រើសេវា ជូនអ្នកទេសចរនាយករដ្ឋមន្រ្តីកម្ពុជា បានទទួលយកនូវសំណូមពរមួយចំនួន។
ក្នុងនោះ ប្រមុខរដ្ឋាភិបាលបាន ផ្តល់ជាដំណោះស្រាយមួយចំនួនដូចជា កសាងផ្លូវកៅស៊ូ៨គីឡូម៉ែត្រ លើផ្លូវក្រាលគ្រួសក្រហម ដែលមានស្រាប់ ដើម្បីផ្តល់ភាពងាយស្រួលក្នុងការធ្វើដំណើរ និងកាត់បន្ថយការហុយ។
សម្តេចធិបតីក៏បានសម្រេច កសាងបញ្ជរលក់សំបុត្រថ្មីរបស់សហគមន៍ ដែលនឹងជួយឱ្យសហគមន៍ មិនចាំបាច់ជួលដី ដើម្បីលក់សំបុត្រដូចពេលបច្ចុប្បន្ន ហើយនិងផ្តល់បន្ថែមនូវធុងសំរាមក្នុងសហគមន៍ ដើម្បីថែរក្សាអនាម័យ និងបរិស្ថាន នៅក្នុងតំបន់ផងដែរ៕
