ដោយ វុត្ថា
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពជាបានប្រកាសសារជាថ្មីថា នឹងមិនមានគម្រោងសាងសង់ទំនប់វារីអគ្គិសនីនៅតំបន់អារ៉ែងឡើយ បើទោះបីមានការសិក្សារួចហើយក្តី។
សម្តេចតេជោបញ្ជាក់ជាថ្មីមិនអនុញ្ញាតឱ្យសាងសង់វារីអគ្គិសនីនៅតំបន់អារ៉ែង
សម្តេចតេជោ ថ្លែងនៅក្នុងពិធីសម្ពោធដាក់ឱ្យដំណើរការ ជាផ្លូវការនូវប្រព័ន្ធផ្គត់ផ្គង់ទឹកស្អាតខេត្តកំពត សាងសង់ឡើងក្រោមជំនួយរបស់រដ្ឋាភិបាលជប៉ុននៅថ្ងៃទី២ ខែមេសា ឆ្នាំ២០១៩នេះថា ការមិនអនុញ្ញាតឱ្យមានការសាងសង់ ទំនប់វារីអគ្គិសនីនៅតំបន់អារ៉ែងខេត្តកោះកុងនេះ ដោយសារតែទុកតំបន់នេះ ជាតំបន់អេកូទេសទេសចរណ៍សម្រាប់ប្រជាពលរដ្ឋទៅលេងកម្សាន្តតែប៉ុណ្ណោះ។
សម្តេចតេជោហ៊ុន សែន ក៏ធ្លាប់បានប្រាកាសកាលពីឆ្នាំ២០១៨រួចម្តងរួចមកហើយថា មិនទាន់មានសេចក្តីសំរេចណាមួយ លើគម្រោងសាងសង់ទំនប់វារីអគ្គិសនី តំបន់អារ៉ែង ក្នុងខេត្តកោះកុង គឺត្រូវសិក្សាឱ្យបានច្បាស់លាស់ជាមុនសិន។ ប៉ុន្តែទោះជាការសិក្សាច្បាស់ ឬមិនច្បាស់លាស់ក៏ដោយ តាមសម្តេចនាយករដ្ឋមន្ត្រី ពីពេលនេះរដ្ឋាភិបាលមិនអនុញ្ញាតឱ្យសាងសង់ទំនប់វារីអគ្គិសនីអារ៉ែងឡើយ។
ប្រទេសកម្ពុជាក្នុងរយៈពេលប៉ុន្មានឆ្នាំចុងក្រោយនេះ មានវ៉ារីអគ្គីសនីជាច្រើនរួមមានទំនប់វ៉ារីតាតៃខេត្កកោះកុង ទំនប់វ៉ារីអគ្គិសនីយ៍សេសាន២ ខេត្តស្ទឹងត្រែង ទំនប់វ៉ារីកម្ចាយ ខេត្តកំពត និងមានគម្រោងទំនប់វ៉ារីមួយចំនួនទៀតនៅក្នុងខេត្តពោធិ៍សាត់ដែលគ្រោងនឹងសាងសង់នាពេលខាងមុខនេះដែលអាចផ្គត់ផ្គង់អគ្គិសនីយ៍សម្រាប់ប្រជាពលរដ្ឋប្រើប្រាស់ឱ្យគ្រប់តម្រូវការ។
តែយ៉ាងណាដោយសម្រាប់រដូវប្រាំង ឆ្នាំ២០១៩នេះ ទំនប់វារីអគ្គិសនីមួយចំនួនមិនមានទឹកគ្រប់គ្រាន់ បានធ្វើឱ្យតម្រូវការនៃផ្គត់ផ្គង់ដល់ដំណើរការ ខ្សែសង្វាក់អគ្គិសនីមិនមានតំណើរការល្អ បណ្តាលឱ្យប្រទេសកម្ពុជាមានកង្វះខាតអគ្គីសនី ប្រើប្រាស់គ្រប់គ្រាន់។
ជាមួយគ្នានេះ រដ្ឋាភិបាលកម្ពុជា បាននឹងកំពុងចចារជាមួយប្រទេសជិតខាងដូចជាប្រទេសថៃ វៀតណាម និងឡាវ ដើម្បីទិញអគ្គីសនីបន្ថែម និងបានបញ្ជាទិញកាប៉ាលអគ្គិសនីយ៍ពីប្រទេសទួរគី សម្រាប់ផ្គត់ផ្គង់ឱ្យគ្រប់តម្រូវការជូនប្រជាពលរដ្ឋនារដូវប្រាំងនេះ៕
