ដោយ: គង់ លាងហួរ
អន្តរជាតិ: ប្លុកអាស៊ានក្នុងនាមជាតំបន់មានប្រវត្តិសាស្ត្រដ៏សម្បូរបែប ភាពរស់រវើកនៃវប្បធម៌ និងទេសភាពដ៏ស្រស់ស្អាតបានក្លាយជាគោលដៅសម្រាប់ដំណើរទេសចរណ៍ផ្សងព្រេង។
ក្នុងនោះ ប្រទេសវៀតណាម ឥណ្ឌូនេស៊ី ឡាវ ថៃ និងកម្ពុជា ជាបណ្តាប្រទេសលេចធ្លោនាំមុខគេក្នុងតំបន់អាស៊ាន ដោយទាក់ទាញអ្នកធ្វើដំណើរមកជុំវិញពិភពលោក។ ប្រទេសទាំង៥នេះផ្តល់បទពិសោធន៍ចម្រុះដល់ភ្ញៀវទេសចរណ៍ ដូចជាការដើរលេង ការជ្រមុជទឹក ការកម្សាន្ត និងទេសចរណ៍បែបធម្មជាតិ។
តួយ៉ាង កម្ពុជាជាគោលដៅទេសចរណ៍បែបផ្សងព្រេង ផ្សារភ្ជាប់ជាមួយប្រវត្តិសាស្ត្រ។ ជាក់ស្ដែង រមណីយដ្ឋានបុរាណអង្គរផ្តល់ជូនដំណើរទេសចរណ៍ជិះកង់ឆ្លងកាត់តំបន់ប្រាសាទបុរាណជាច្រើន លាយឡំការផ្សងព្រេងជាមួយនឹងការបញ្ជ្រាបវប្បធម៌។
ជាមួយគ្នានេះ តំបន់ទេសចរណ៍ជួរភ្នំក្រវាញ ជាគោលដៅស័ក្តិសមសម្រាប់ការដើរលេង និងទស្សនាសត្វព្រៃ និងផ្តល់នូវជម្រើសនៃការធ្វើដំណើរប្រកបដោយនិរន្តរភាព។
រីឯ បឹងទន្លេសាបជាគោលដៅល្អឥតខ្ចោះសម្រាប់ការជិះទូកកាយ៉ាក់ និងទស្សនាទេសភាពភូមិបណ្តែតទឹក ដែលផ្តល់ឱ្យអ្នកទស្សនានូវទិដ្ឋភាពនៃជីវិតរស់នៅបែបប្រពៃណីខ្មែរ។
សកម្មភាពទេសចរណ៍ដ៏ពេញនិយម
រួមមានដំណើរទេសចរណ៍ធម្មជាតិ ដូចជាការស្នាក់នៅផ្ទះសំណាក់ក្នុងតំបន់ដាច់ស្រយាល គាំទ្រសហគមន៍មូលដ្ឋាន និងកិច្ចខិតខំប្រឹងប្រែងអភិរក្សបរិស្ថានធម្មជាតិ។
លើសពីនេះ ភ្ញៀវទេសចរណ៍ក៏អាចដើរលេងកំសាន្តបែបផ្សងព្រេងនៅក្នុងព្រៃក្រាស់នៃតំបន់ជួរភ្នំក្រវាញដើម្បីទស្សនារុក្ខជាតិ និងសត្វកម្រ។
ចំណែកឯ ដំណើរទេសចរណ៍វប្បធម៌ រួមបញ្ចូលនូវដំណើរផ្សងព្រេង ដែលផ្សារភ្ជាប់ជាមួយប្រវត្តិសាស្រ្ត ដោយការស្វែងយល់ពីប្រាសាទអង្គរវត្ត និងប្រាសាទបុរាណផ្សេងទៀត៕ប្រភព:Travel & Tour World៕
