ដោយៈ ច្រាយ ចំណាន
ខេត្តកែបៈ លោកឧបនាយករដ្ឋមន្រ្តីសាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់បានលើកឡើងថា ឧស្សាហកម្មទេសចរណ៍ នៅតែជាមុខព្រួញសំខាន់ សម្រាប់សេដ្ឋកិច្ចរបស់ខេត្តកែប។
អញ្ជើញចូលរួមក្នុងឱកាសសន្និបាត ការងាររបស់ខេត្តកែបកាលពីសប្តាហ៍មុន លោកឧបនាយករដ្ឋមន្រ្តីបានលើកឡើងបន្តថា ឧស្សាហកម្មទេសចរណ៍ នៅតែជាមុខព្រួញសំខាន់ ក្នុងខឿនសេដ្ឋកិច្ចរបស់ខេត្ត ការប្រាស្រ័យទាក់ទងជាមួយអាជីវករ ដែលមានបទពិសោធន៍ចាស់ -ថ្មីក្នុងវិស័យនេះ អាចនឹងកំណត់បានបន្ថែមទៀត នូវតម្រូវការរបស់ភ្ញៀវទេសចរ ក្នុងស្រុកមានកម្រិតជីវភាពមធ្យម ជាពិសេសបង្កលក្ខណៈងាយស្រួល ដល់ប្រជាជនដែលមានទីលំនៅ ក្នុងខេត្តជាប់ព្រំប្រទល់ អញ្ជើញមកទស្សនាកំសាន្តបានកាន់តែច្រើន និងកាន់តែញឹកញាប់។
-->
លោកបញ្ជាក់ថា “អំណោយផលពីធម្មជាតិ គឺអាកាសធាតុល្អ និងខ្យល់ជំនោរបរិសុទ្ធរបស់ខេត្ត តាមបណ្តោយឆ្នេរសមុទ្រ ក៏ជាសក្តានុពលល្អ ននិងជាជម្រើសថ្មី សម្រាប់ការរៀបចំផ្ទះលម្ហែសម្រាប់មនុស្សវ័យជរា ឬវ័យចំណាស់មានជម្ងឺត្រូវការថែទាំជាប្រចាំ”។
លោកសាយ សំអាល់បានផ្តល់អនុសាសន៍ថា ការរៀបចំសេវាកម្ម និងហេដ្ឋារចនាសម្ព័ន្ធចាំបាច់ ក្នុងវិស័យទេសចរណ៍ ក៏គួររំលេច និងពង្រឹងនូវសក្តានុពល ដែលអាចជាកត្តាទាក់ទាញចំណាប់អារម្មណ៍ របស់ភ្ញៀវទេសចរបរទេស ដែលនៅជាប់ព្រំប្រទល់ជិតខាងឱ្យមកទស្សនាកម្សាន្ត។
បន្ថែមលើនេះទៀត សូមចូលរួមលើកទឹកចិត្ត ដល់ការរៀបចំសហគមន៍នេសាទតាមបែបប្រពៃណី តាមរយៈការលើកទឹកចិត្តឱ្យដាំដុះបន្លែ ផ្តល់ដើមទុនសមល្មមឱ្យមានផ្លូវចូលទៅដល់សហគមន៍ មានបន្ទប់ទឹកស្អាត និងចំណតរថយន្តសមរម្យ ដើម្បីប្រែក្លាយទីតាំងសហគមន៍នេសាទ ទៅជាគោលដៅទេសចរក្នុងស្រុក ជាប្រភពផ្តល់ប្រាក់ចំណូលបន្ថែមជួយដល់ជីវភាពប្រជាជនក្នុងសហគមន៍។
លោកបន្តថា កិច្ចការនេះអាចសម្រេចទៅបាន ដោយសារមានការចូលរួមសហការយ៉ាងសកម្ម គួរឱ្យស្ញើចសរសើរ ជាពិសេសក្រុមការងារថ្នាក់ជាតិចុះជួយមូលដ្ឋាន ដែលបានចុះជាប់ ជាមួយរដ្ឋបាលថ្នាក់ក្រោមជាតិ និងប្រជាជន ប្រកបដោយឥរិយាបថទទួលខុសត្រូវខ្ពស់។
លោកបញ្ជាក់ទៀតថា គ្រប់សមិទ្ធផលកិច្ចការទាំងអស់ដែលសម្រេចបាន គឺបង្ហាញពីប្រសិទ្ធភាព និងគុណភាពរដ្ឋបាលសាធារណៈទំនើប ដែលបានរៀបចំត្រឹមត្រូវ ប្រកបដោយភាពវាងវៃ និងអត់ធ្មត់ ដែលជាសមិទ្ធផលដ៏ធំធេង ក្រោមគុណបំណាច់នៃកិច្ចខិតខំប្រឹងប្រែង របស់សម្តេចក្រឡាហោម អតីតប្រមុខថ្នាក់ដឹកនាំក្រសួងមហាផ្ទៃ ក្រោមការចង្អុលបង្ហាញប្រកបដោយទស្សនវិស័យ របស់សម្តេចអគ្គមហាសេនាបតីតេជោហ៊ុនសែន។
លោកសាយ សំអាល់បានបន្តថា យោងកត្តាភូមិសាស្ត្រ និងប្រជាជនក្នុងមូលដ្ឋាន គួរផ្តួចផ្តើមគិតគូរពីលទ្ធភាពម្ចាស់ ការលើផលិតផលកសិកម្មក្នុងស្រុក ដែលជាចំណែកទ្រទ្រង់ដល់ប្រយោជន៍សុខភាពសាធារណៈ សម្រាប់ផ្គត់ផ្គង់ទីផ្សារក្នុងស្រុក ដោយប្រើប្រាស់ផ្ទៃដីដាំដុះដែលមាន មុននឹងឈានទៅពង្រឹងបច្ចេកទេស សម្រិតសម្រាំងផលិតផលក្នុងស្រុក សម្រាប់នាំចេញ ដើម្បីបើកច្រកសេដ្ឋកិច្ច សំដៅបង្កើនចំណូល។ ក្រៅពីកសិកម្មក្នុងស្រុក ក៏គួរគិតគូរពីការដាំដំណាំ និងរុក្ខជាតិសម្រាប់ពាណិជ្ជកម្មផងដែរ៕
