ដោយ វល័ក្ខ
ភ្នំពេញ៖ មន្រ្តីជាន់ខេត្តកំពង់ស្ពឺបានអះអាងថា ក្រុមហ៊ុនផលិតទូរស័ព្ទ OPPO និង VIVO របស់ចិន នឹងចូលមកវិនិយោគនៅកម្ពុជានាពេលឆាប់ៗខាងមុខនេះ។
លោក វ៉ី សំណាង អភិបាលខេត្តកំពង់ស្ពឺ បានមានប្រសាសន៍ឲ្យដឹងក្នុងដំណើរទ ស្សនកិច្ចរបស់លោកទៅកាន់ក្វាង ទុងប្រទេសចិនរយៈពេលពីរថ្ងៃចាប់ផ្តើមពីថ្ងៃទី៩ ដល់ទី១០មេសានេះថា ក្រុមហ៊ុនទូរស័ព្ទចំនួន២ គឺក្រុមហ៊ុន OPPO និង VIVO នឹងចូលមកវិនិយោគនៅកម្ពុជានាពេលខាងមុខនេះ។ ក្រុមហ៊ុននេះ ជាក្រុមហ៊ុនផលិតទូរស័ព្ទរបស់ចិន ដែលកំពុងគ្របដណ្តប់ចំណែកទីផ្សារធំមួយនៅលើពិភពលោក។
លោកបន្តថា“ជាមួយនឹងផែនការអភិវឌ្ឍន៍របស់ខ្លួន ក្រុមហ៊ុននេះនឹងនឹងសាងសង់អាគារកម្ពស់ ១០០ទៅ ២០០ម៉ែត្រ នៅខេត្តកំពង់ស្ពឺ ដើម្បីដំណើរការគំរោងវិនិយោគរបស់ខ្លួន”។
លោកបូរិទ្ឋ អ្នកនាំចូលទូរស័ព្ទពីក្រៅប្រទេសមកកាន់កម្ពុជាបានមានប្រសាសន៍ថា វាជារឿងល្អប្រសើរសំរាប់ប្រទេសកម្ពុជា ជាមួយវត្តមានក្រុមហ៊ុនទូរស័ព្ទចិនធំៗទាំងពីរនេះ ព្រោះវាមិនត្រឹមតែជួយធ្វើឲ្យសេដ្ឋកិច្ចកម្ពុជាមានការរីកចម្រើន តាមរយៈការផ្តល់ការងារដល់ប្រជាជនក្នុងស្រុក ឲ្យទទួលបានប្រាក់ចំណូលខ្ពស់។ វត្តមានក្រុមហ៊ុននេះ ក៏ជួយ ធ្វើឲ្យមានការរីកចម្រើនផ្នែកចំណេះដឹងបច្ចេកវិទ្យា ដល់យុវជនកម្ពុជាផងដែរ។
លោកបន្តថា “វត្តមានក្រុមហ៊ុនទាំងពីរនេះ មិនធ្វើឲ្យមានផលប៉ះពាល់ឬខាតបង់ចំណែកទីផ្សារទូរស័ព្ទ Smart Phone នៅកម្ពុជានោះទេ ដោយសារការផលិតទូរស័ព្ទប្រភេ ទនេះមិនសំរាប់តែទីផ្សារក្នុងស្រុកឡើយ”៕