ដោយ រតនៈ
ភ្នំពេញ៖ ពិធីបុណ្យចូលឆ្នាំ្មថ្មី ប្រពៃណីជាតិខ្មែរ តែងតែប្រារព្ធឡើងនាថ្ងៃទី១៤ ១៥ និង១៦ ខែមេសាជារៀងរាល់ឆ្នាំ។ ដូច្នេះហើយ មុនថ្ងៃបុណ្យចូលឆ្នាំថ្មី យើងសង្កេតឃើញថា នៅតាមស្ថាប័នរដ្ឋ និងស្ថាប័នឯកជនមួយចំនួន បានរៀបចំតុបតែងលំអស្ថាប័នខ្លួនដើម្បីទទួលអំណរទេវតាឆ្នាំថ្មី។
បើលោកអ្នកបានធ្វើដំណើរឆ្លងកាត់ ផ្លូវជាតិលេខ១ ចំងាយ៥នាទីប៉ុណ្ណោះពីស្ពានព្រះមុនីវង្ស (ច្បារអំពៅ) នៅពីខាងស្តាំដៃលោកអ្នកប្លែកភ្នែក ពីការរៀបចំចង្កៀងគោមផ្កាយ អមទៅដោយក្បូក្បាច់ រចនាផ្ការំដួល ខ្មែរបានរំលេចឡើងនូវភាពស្រស់ស្អាត នៅលើដងផ្លូវអមសងខាង ច្រកខ្លោងទ្វារ បុរី ប៉េង ហួត ហ្គ្រេនស្តាផ្លាទីនីម (បឹងស្នោ) ដែលបានតុបតែងជារៀងរាល់ឆ្នាំ ដើម្បីស្វាគមន៍បុណ្យចូលឆ្នាំថ្មី និងអ្នកធ្វើដំណើរឆ្លងកាត់គ្រប់រូបចូលថតរូបកម្សាន្ត ទុកជាអនុស្សារីយ៍ផងដែរ។
ស្នាដៃតុបតែងខាងលើនេះ កើតចេញពីគំនិតកូនខ្មែរ ព្រមទាំងរៀបចំទៅតាមរចនាបថខ្មែរសុទ្ធសាធ ដើម្បីសិរីសួស្តី វិបុលសុខ សុភមង្គល ក្នុងឆ្នាំថ្មីនេះ៕