ដោយៈ និស្ស័យ
ភ្នំពេញៈ រដ្ឋមន្រ្តីក្រសួងទេសចរណ៍ លោកហួត ហាក់បានលើកឡើងថា កត្តាសុខសន្តិភាព ស្ថិរភាពនយោបាយ សុវត្ថិភាពសង្គម ការរីកចំរើនដ៏ឆាប់រហ័ស និងគោលនយោបាយលើកទឹករបស់រាជរដ្ឋាភិបាលកម្ពុជា បានកំពុងទាក់ទាញភ្ញៀវទេសចរអន្តរជាតិ និងវិនិយោគិនឱ្យមកទស្សនាប្រទេសកម្ពុជាកាន់តែច្រើនឡើង។
លោកលើកឡើងបែបនេះ ក្នុងពេលបានអនុញ្ញាតជូនលោក ឈិន រតនា កវីនិពន្ធ និងជាប្រធានយុវជនប្រចាំទីក្រុងរិនតុន រដ្ឋវ៉ាស៊ីនតោន សហរដ្ឋអាមេរិក និងក្រុមការងារ ចូលជួបសម្តែងការគួរសម និងស្នើសុំអនុសាសន៍ណែនាំ ពាក់ព័ន្ធនឹងវិស័យទេសចរណ៍កម្ពុជា ព្រមទាំងប្រគល់ជូនសៀវភៅ TRAVEL EXPLORATION OF CAMBODIA ដែលសៀវភៅនេះ ផ្តោតលើការផ្សព្វផ្សាយសក្តានុពលទេសចរណ៍ វប្បធម៌ ប្រវត្តិសាស្ត្រ ធម្មជាតិ និងទនៀមទំលាប់ប្រពៃណី ព្រមទាំងការអភិវឌ្ឍរបស់វិស័យទេសចរណ៍កម្ពុជា ទៅកាន់ពិភពលោក។
-->
ក្នុងឱកាសនៃជំនួបដ៏មានសារៈសំខាន់ និងផ្លែផ្កានេះ លោករដ្ឋមន្រ្តី បានថ្លែងនូវអំណរគុណ ព្រមទាំងកោតសរសើរ និងវាយតម្លៃខ្ពស់ចំពោះគំនិតផ្តួចផ្តើម ចងក្រងនូវសៀវភៅដ៏មានសារៈសំខាន់ពាក់ព័ន្ធនឹងវិស័យទេសចរណ៍កម្ពុជានេះ ដែលពិតជាកម្លាំងចលករដ៏សំខាន់ក្នុងការជួយផ្សព្វផ្សាយ សក្តានុពលទេសចរណ៍ដ៏សម្បូរបែប និងកាលានុវត្តវិនិយោគរបស់កម្ពុជា ទៅកាន់ពិភពលោក។
ជាមួយគ្នានេះដែរ លោកប្រធានយុវជន ក៏បានសន្យានឹងជួយសហការផ្សព្វផ្សាយ ពីសភាពការណ៍ពិតដូច ដែលក្រុមការងារបានមកដល់ និងឃើញជាក់ស្តែងថាកម្ពុជា ជាប្រទេសមានសន្តិភាព ស្ថិរភាពនយោបាយ សន្តិសុខសណ្តាប់ធ្នាប់សង្គមល្អប្រសើរ និងមានការអភិវឌ្ឍលើគ្រប់វិស័យ ជាពិសេសបដិសណ្ឋារកិច្ចដ៏កក់ក្តៅ ការស្នាក់នៅប្រកបដោយផាសុកភាព ម្ហូបអាហារដ៏មានឱជារស ការកំសាន្តសម្បូរបែប ដែលជំរុញឱ្យភ្ញៀវទេសចរអន្តរជាតិ ក្នុងនោះប្រជាពលរដ្ឋអាមេរិក អញ្ជើញមកទស្សនាកម្ពុជា ឱ្យបានកាន់តែច្រើនឡើងបន្ថែមទៀត៕
