ដោយៈ ម៉ាណា
កំពង់ធំៈ ក្រសួងវប្បធ៌ម និងវិចិត្រសិល្បៈ បានរៀបចំព្រឹត្តិការណ៍រត់ប្រណាំងឆ្លងកាត់ឧបសគ្គ (Sambor Prei Kuk Trail 2025) នៅរមណីយដ្ឋានប្រាសាទសំបូរព្រៃគុក។
ការរត់ប្រណាំងនេះ ស្ថិតនៅលើចម្ងាយផ្លូវមានចម្ងាយ៨គីឡូម៉ែត្រ ១៦គីឡូម៉ែត្រ និង៣២គីឡូម៉ែត្រ ដែលរៀបចំឡើងដោយសហព័ន្ធកីឡាឧបសគ្គកម្ពុជា។ ព្រឹត្តិការណ៍កីឡានេះ មានការចូលរួមពីមន្រ្តីរាជការ ប្រជាពលរដ្ឋ សិស្ស ភ្ញៀវទេសចរជាតិ និងភ្ញៀវទេសចរអន្តរជាតិ សរុបប្រមាណ៣០០នាក់។
កម្មវិធីនេះរៀបចំឡើងវេលាម៉ោង៥:៣០នាទីព្រឹក ក្នុងគោលបំណង ដើម្បីបំផុសឱ្យប្រជាពលរដ្ឋ ចូលរួមលេងកីឡាដើម្បីសុខភាព ផ្សារភ្ជាប់នឹងការស្រឡាញ់បរិស្ថានធម្មជាតិ ទេសចរណ៍ មិត្តភាព និងការអភិវឌ្ឍសេដ្ឋកិច្ចមូលដ្ឋាន តាមរយៈព្រឹត្តិការណ៍កីឡារត់ប្រណាំងឆ្លងកាត់ឧបសគ្គ។
កម្មវិធីក៏មានការផ្តល់ជាមេដាយកិត្តិយស ទុកជាវត្ថុអនុស្សាវរីយ៍សម្រាប់កីឡាករ កីឡាការិនីដែលបានចូលរួមទាំងអស់គ្នា៕
