ដោយ វុត្ថា
ភ្នំពេញ៖ ធនាគារពិភពលោក (World Bank) បានព្យាករណ៍ពីកំណើនសេដ្ឋកិច្ចរបស់កម្ពុជា កំពុងប្រឈមមកនឹងការធ្លាក់ចុះមកនៅក្រោមកម្រិត៧ភាគរយ សម្រាប់ ឆ្នាំ២០១៩-២០២១ ដោយសារបញ្ហាមួយចំនួន។
យោងតាមរបាយការណ៍របស់ធនាគារពិភពលោក ចេញផ្សាយនៅថ្ងៃទី២៤ ខែមេសា ឆ្នាំ២០១៩នេះបានឲ្យដឹងបន្តថា ក្រោយពីសម្រេចបាន កំណើនលឿនដល់៧.៥ភាគរយ នៅក្នុងឆ្នាំ២០១៨មក សេដ្ឋកិច្ចរបស់កម្ពុជា ត្រូវបានរំពឹងទុកថា នឹងបង្វែរការយកចិត្តទុកដាក់ ទៅលើសក្តានុពលវែងឆ្ងាយម្តង។
ដោយការនាំចេញ នៅមានកម្រិតមធ្យម ស្របពេលដែលតម្រូវការលើពិភពលោកថយចុះ កំណើនពិតប្រាកដរបស់សេដ្ឋកិច្ច ត្រូវបានប៉ាន់ប្រមាណទុកថា នឹងថមថយអានុភាពបន្តិចមកវិញ មកនៅជិត៧ភាគរយ រវាងឆ្នាំ២០១៩-២០២១។ចក្ខុវិស័យក្នុងរយៈពេលវែងឆ្ងាយអាស្រ័យ លើសមត្ថភាពរបស់ប្រទេស ក្នុងការស្រូបយករំហូរនៃការវិនិយោគផ្ទាល់ពីបរទេស ជាមួយការលើកកម្ពស់ការវិនិយោគក្នុងស្រុកផងដែរ។ នេះបើតាមការបញ្ជាក់បន្ថែម ក្នុងរបាយការណ៍ របស់ធនាគារពិភពលោក។
