ដោយៈ គង់ សូរិយា
ភ្នំពេញៈ ទីភ្នាក់ងារអភិវឌ្ឍន៍បារាំង(AFD)ប្រចាំនៅកម្ពុជា បានជួយអភិវឌ្ឍន៍ សាលាវិជ្ជាជីវៈទេសចរណ៍ស្តង់ដាដំបូងគេ ចំនួន២នៅកម្ពុជា។
លោកហួត ហាក់ រដ្ឋមន្ត្រីក្រសួងទេសចរណ៍កាលពីចុងសប្តាហ៍មុន បានអញ្ជើញទស្សនកិច្ចនៅសាលាវិជ្ជាជីវៈទេសចរណ៍ ដើម្បីពិនិត្យលើហេដ្ឋារចនាសម្ព័ន្ធរឹង និងទន់ ដើម្បីត្រៀមទទួលសិស្សចូលរៀននាពេលខាងមុខ។
សាលាវិជ្ជាជីវៈទេសចរណ៍មានចំនួន២ទីតាំង មួយនៅរាជធានីភ្នំពេញ និងមួយនៅខេត្តព្រះសីហនុ ត្រូវបានសាងសង់រួចរាល់ជាមួយនឹងស្ថាបត្យកម្មទំនើប សំណង់មានគុណភាពខ្ពស់ មានផាសុកភាព និងបរិស្ថានជុំវិញស្អាតបាត ព្រមទាំងបានបំពាក់នូវឧបករណ៍ បរិក្ខាសម្ភារថ្មីៗ ទំនើបៗ និងមានភាពទាក់ទាញ គួរឱ្យចង់មកសិក្សារៀនសូត្រ។
សាលាទាំង២ទីតាំងនេះ កើតចេញពីគម្រោងហិរញ្ញប្បទានឥណទានរបស់រាជរដ្ឋាភិបាលកម្ពុជា និង ទីភ្នាក់ងារបារាំងសម្រាប់អភិវឌ្ឍន៍ (AFD) ក្នុងគោលបំណងផ្តល់ការបណ្តុះបណ្តាលជំនាញទេសចរណ៍ ប្រកបដោយវិជ្ជាជីវៈ និងគុណភាព៕
