ដោយ គង់ សូរិយា
ភ្នំពេញ៖ ឯកអគ្គរដ្ឋទូតហ្វីលីពីនប្រចាំកម្ពុជាបានអះអាងថា ក្រុមហ៊ុនអាកាសចរណ៍ Philippine Airline គ្រោងពង្រីកជើងហោះហើរមកកាន់ខេត្តសៀមរាប ខណៈក្រុមហ៊ុននេះបានតភ្ជាប់ជើងហោះហើរពីទីក្រុងម៉ាលីន មកកាន់រាជធានីភ្នំពេញកាលពីដើមខែមេសានេះ។
លោកកៅ គឹមហួនរដ្ឋមន្រ្តីប្រតិភូអមនាយករដ្ឋមន្រ្តី បានមានប្រសាសន៍ប្រាប់ក្រុមអ្នកសារព៌តមានក្រោយជំនួបជំរាបលាសម្តេចតេជោហ៊ុន សែននាយករដ្ឋមន្រ្តីកម្ពុជាកាលពីថ្ងៃទី២៤ មេសាកន្លងមកនេះ លោក Chirstopher Baltazar Montero ថា កន្លងមកក្រុមហ៊ុន Philippine Airline បានភ្ជាប់ជើងហោះហើរមកកាន់រាជធានីភ្នំពេញហើយ ប៉ុន្តែដោយសារការរីកចម្រើននៃវិស័យទេសចរណ៍ និងវិស័យសំណង់នៅកម្ពុជា ក្រុមហ៊ុនអាកាសចរណ៍នេះ នឹងពង្រីកជើងហោះហើរមកកាន់ខេត្តសៀមរាប។នេះបើតាមលោកកៅ គឹមហួនរដ្ឋមន្រ្តីប្រតិភូអមនាយករដ្ឋមន្រ្តីបានប្រាប់ក្រុមអ្នកកាសែតបន្ទាប់ពីជំនួប។
ជាមួយគ្នានេះលោកទូត ក៏បានសន្យានឹងជំរុញអ្នកវិនិយោគពីប្រទេសហ្វីលីពីន មកវិនិយោគនៅកម្ពុជាផងដែរ។
បើយោងតាមលោកស្រីឆាយ ស៊ីវលីនប្រធានសមាគមទីភ្នាក់ងារទេសចរណ៍កម្ពុជាបានមានប្រសាសន៍ឲ្យដឹងថា វាជារឿងដែលល្អប្រសើរសំរាប់កម្ពុជា ដែលមានអាកាសចរណ៍ពង្រីកជើងហោះហើរទៅកាន់ខេត្តសៀមរាប ព្រោះវាផ្តល់ជំរើសកាន់តែច្រើនសំរាប់ភ្ញៀវទេសចរណ៍ ខណៈបច្ចុប្បន្នក្រុមហ៊ុន Cebu Pacific របស់ហ្វីលីពីន បាននិងកំពុងភ្ជាប់ជើងហោះហើរត្រង់មកកាន់ក្រុងសៀមរាបរួចហើយ។
លោកស្រីបន្តថា “ប្រទេសហ្វីលីពីនមានភ្ញៀវទេសចរណ៍ច្រើន ដែលការតភ្ជាប់នេះមិនត្រឹមតែកម្ពុជាអាចទទួលភ្ញៀវទេសចរណ៍ហ្វីលីពីននោះទេ តែអាចទទួលភ្ញៀវទេសចរណ៍ប្រទេសទី៣មកទស្សនាកម្ពុជាបន្ថែមទៀត”៕
