ដោយ វុត្ថា
ភ្នំពេញ៖ ក្នុងរយៈពេលជិត៦ឆ្នាំកន្លងមកនេះ បណ្តាប្រទេសអាស៊ាននិងប្រទេសចិន ទទួលបាននូវលទ្ធផលប្រកបដោយផ្លែផ្កា នៅក្នុងវិស័យកិច្ចសហប្រតិបត្តិការក្រោមគំនិតផ្តួចផ្តើម“ផ្លូវមួយ និងខ្សែក្រវាត់មួយ” ដោយក្នុងនោះ ទំហំពាណិជ្ជកម្មរវាងភាគីទាំងពីរបានឈានដល់៥៨៧.៨៧ ពាន់លានដុល្លារអាមេរិកក្នុងឆ្នាំ២០១៨ ។
យោងតាមការចុះផ្សាយរបស់វិទ្យុមិត្តភាពកម្ពុជា-ចិនចុះផ្សាយកាលពីពេលថ្មីៗនេះ បានឲ្យដឹង គំនិតផ្តួចផ្តើម“ផ្លូវមួយ និងខ្សែក្រវាត់មួយ” មិនត្រឹមតែបង្ហាញពី”គម្រោងផែនការទូទៅ”សម្រាប់ការធ្វើឲ្យស៊ីជម្រៅនូវកិច្ចសហប្រតិបត្តិការរវាងចិននិងអាស៊ានប៉ុណ្ណោះទេ ថែមទាំងជួយឲ្យគ្រួសារសាមញ្ញនិងអ្នកចូលរួមនីមួយៗ សម្រេចបាននូវក្តីសុបិន្តតូចៗរបស់ពួកគេផងដែរ។
យោងតាមប្រភពសារព័ត៌មានស៊ីនហួរចុះផ្សាយ កាលពីថ្ងៃទី២១ មេសាកន្លងមកនេះ បានឱ្យដឹងថា សម្រាប់ប្រទេសកម្ពុជា ស្ថិតនៅក្នុងតំបន់អាស៊ានដែលទទួលបានការគាំទ្រយ៉ាងមុតមាំ ពីគំនិតផ្តួចផ្តើមខ្សែក្រវាត់មួយផ្លូវមួយរបស់ប្រទេសចិន បានទទួលនូវអត្ថប្រយោជន៍នៅលើវិសយ័ជាច្រើន តាមរយៈកិច្ចសហប្រតិបត្តិការសេដ្ឋកិច្ចដ៏ទូលំទូលាយ ជាមួយប្រទេសចិននៅក្នុងការពង្រីកសក្តានុពលសេដ្ឋកិច្ចរបស់ខ្លួន និងពង្រឹងការងើបឡើងវិញនៃសេដ្ឋកិច្ច។
-->
លោក ខៀវ កាញារីទ្ធ រដ្ឋមន្ត្រីក្រួសួងព័ត៌មានបានថ្លែងថា “ សម្រាប់កម្ពុជា ដោយមានជំនួយពីចិន យើងអាចកសាងគម្រោងហេដ្ឋារចនាសម្ព័ន្ធធំៗបាន ហើយគម្រោងទាំងនោះមានសារៈសំខាន់ណាស់ ក្នុងការជំរុញកំណើនសេដ្ឋកិច្ច និងធ្វើឱ្យទំនាក់ទំនងជាមួយគ្នា កាន់តែមានភាពងាយស្រួលនិងឆាប់រហ័ស”។
បើយោងតាមទិន្នន័យថ្មីៗនេះ ដែលស្ថានទូតចិនប្រចាំនៅកម្ពុជា បានបង្ហោះនៅលើបណ្តាញសង្គមបានឱ្យដឹងថា ប្រទេសចិនបានកសាងផ្លូវហាយវ៉េចំនួន៣១ខ្សែ និងស្ពានចំនួន៨ឱ្យកម្ពុជា ដែលសរុបផ្លូវហាយវ៉េមានប្រវែងរហូតដល់ទៅ ៣០០០ គីឡូម៉ែត្រ ហើយចិនក៏បានសាងសង់ស្ថានីយវារីអគ្គិសនីនៅកម្ពុជាទៀងផង។
លោក ខៀវ កាញារីទ្ធ បានថ្លែងទៀតថា “អាទិភាពដំបូងរបស់យើង គឺជំរុញកំណើនសេដ្ឋកិច្ច និងធ្វើឱ្យអ្នកទាំងអស់គ្នាមានចំណែកស្មើគ្នានៅក្នុងកំណើនសេដ្ឋកិច្ចនេះ។ គំនិតផ្តួចផ្តើមខ្សែ ក្រវាត់មួយផ្លូវមួយ អាចជួយយើងតាមរយៈការគាំទ្រគម្រោងអភិវឌ្ឍន៍ហេដ្ឋារចនាសម្ពន្ធ័ និងធនធានមនុស្ស”។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបាននិយាយថា នៅក្រោមកិច្ចសហប្រតិបត្តិការកម្ពុជា-ចិនក្នុងក្របខណ្ឌ័គំនិតផ្តួចផ្តើមខ្សែក្រវាត់មួយផ្លូវមួយ គឺចិនបានវិនិយោគលើគម្រោងធំៗជាច្រើននៅកម្ពុជា ដែលរួមមាន វារីអគ្គិសនី ផ្លូវថ្នល់ ស្ពាន តំបន់សេដ្ឋកិច្ចពិសេស ផ្លូវល្បឿនលឿនភ្នំពេញ-ព្រះសីហនុ និងអាកាសយានដ្ឋានអន្តរជាតិសៀមរាបថ្មី។
លោកបណ្ឌិតបានថ្លែងទៀតថា “កម្ពុជាមានក្តីរំពឹងខ្ពស់ថាចិននឹងបន្តជួយអភិវឌ្ឍហេដ្ឋារចនាសម្ព័ន្ធនៅកម្ពុជាជាបន្តទៀត។ ធ្វើដូច្នេះវានឹងអាចកាត់បន្ថយតម្លៃទំនិញនៅក្នុងប្រទេសកម្ពុជា ពង្រឹងការប្រកួតប្រជែងក្នុងទីផ្សារសេដ្ឋកិច្ច និងធ្វើឱ្យកំណើនសេដ្ឋកិច្ចកាន់តែប្រសើរ”៕
