ដោយ៖ រ៉ាណេត
ភ្នំពេញ៖ ក្រោមកិច្ចសហប្រតិបត្តិការដ៏ល្អ រួមជាមួយនឹងការផ្តល់ឱកាសវិជ្ជមានលើការវិនិយោគ ក្រុមហ៊ុនធំៗរបស់ជប៉ុនចំនួន ៥ នឹងចូលមកបណ្តាក់ទុនវិនិយោគបន្ថែមនៅកម្ពុជាក្នុងពេលដ៏ខ្លីខាងមុខនេះ ។
ក្រុមហ៊ុនធំរបស់ជប៉ុនចំនួន៥ គ្រោងនឹងចូលមកវិនិយោគបន្ថែមនៅកម្ពុជា
លោកស្រី KAWAAI NINAKO ប្រធានក្រុមហ៊ុន Design Kolo របស់ជប៉ុន និងជាប្រធានគណៈប្រតិភូវិនិយោគរបស់ប្រទេសជប៉ុនបានវាយតម្លៃខ្ពស់ចំពោះសេដ្ឋកិច្ចកម្ពុជា ដែល កំពុងមានសន្ទុះរីកចម្រើនលើគ្រប់វិស័យគួរឱ្យកត់សម្គាល់ ជាពិសេសកម្ពុជាមានកំណើន សេដ្ឋកិច្ចប្រចាំឆ្នាំជាមធ្យមក្នុងរង្វង់ ៧ភាគរយ និងនៅតែរក្សាសន្ទុះកំណើននេះជាបន្តទៀត។
លោកស្រីបានលើកឡើងថា ឈរលើមូលដ្ឋាននេះ បណ្តាក្រុមហ៊ុនវិនិយោគរបស់ជប៉ុនមួយ ចំនួនមានគម្រោងចូលរួមចែករំលែកបទពិសោធដែលខ្លួនមាន ដែលធ្លាប់បានធ្វើរួច ហើយ នៅតាមបណ្តាប្រទេសមួយចំនួន ដើម្បីរួមចំណែក ក្នុងការអភិវឌ្ឍសេដ្ឋកិច្ចប្រទេសកម្ពុជា ប្រយោជន៍ជំរុញការអភិវឌ្ឍប្រទេសកម្ពុជាឱ្យកាន់តែ មានការរីកចម្រើនខ្លាំងឡើងថែមទៀត ជាពិសេសជំរុញកំណើនសេដ្ឋកិច្ចប្រកបដោយចីរភាព សំដៅលើកកម្ពស់កម្រិតជីវភាពរបស់ប្រជាជនកម្ពុជា។
នៅក្នុងគម្រោងចូលមកបណ្តាក់ទុនវិនិយោគពីសំណាក់ក្រុមហ៊ុនធំៗរបស់ជប៉ុននៅកម្ពុជានាពេលដ៏ខ្លីខាងមុខនេះ គឺមានចំនួន៥ ដែលក្នុងនោះរួមមាន ៖ ក្រុមហ៊ុន Design Kolo ដែលមានលោកស្រីជាប្រធានក្រុមហ៊ុន និងមានជំនាញខាងផ្នែកខាងដាំដុះបន្លែដោយប្រើប្រាស់ប្រព័ន្ធទឹកដាំដុះនៅក្នុងអគារ និងជាអ្នកបណ្តុះបណ្តាលផ្នែកធនធានមនុស្ស។ ទី២. ក្រុមហ៊ុន Shibeide មានជំនាញផ្នែកវិជ្ជសាស្រ្ត កសិកម្មដាំដុះ។
ទី៣. ក្រុមហ៊ុន JHJ Global Pty Co. Ltd មានជំនាញខាងនាំចូលនិងនាំចេញសម្ភារសាងសង់។ ទី៤. ក្រុមហ៊ុន Chean Thai Co. Ltd មានជំនាញផ្នែកផលិតបន្ទះសូទ្បា និង ទី៥. ក្រុមហ៊ុនអចលនទ្រព្យ METAYA ។ ប៉ុន្តែចំពោះជំហ៊ានដំបូងដែលចូលមកមុនដំបូងគេ គឺការវិនិយោគលើរោងចក្រផលិតបន្ទះសូឡា រួមជាមួយនឹងការវិនិយោគលើការដាំដុះបន្លែផ្លែឈើ ដោយប្រើប្រាស់ប្រព័ន្ធទឹកដាំដុះនៅក្នុងអគារ និងនាំមកនូវប្រព័ន្ធបច្ចេកវិទ្យាដ៏ទំនើបក្នុងការដាំដុះមកកម្ពុជា ។
កិត្តិបរិរក្សបណ្ឌិត លោក គាត ឈន់ ប្រធានកិត្តិយសឧត្តមក្រុមប្រឹក្សាសេដ្ឋកិច្ចជាតិ បានបង្ហាញពីក្ដីសាទរ និងគាំទ្រទៅលើគម្រោងនៃការចូលមកបណ្តាក់ទុនវិនិយោគរបស់ក្រុមហ៊ុនលំដាប់អន្តរជាតិរបស់ជប៉ុននៅកម្ពុជា ដែលតាមរយៈវត្តមានរបស់ក្រុមហ៊ុនទាំងនេះនឹងចូលរួមរឹតបណ្តឹងចំណងមិត្តភាពរវាងកម្ពុជា ជប៉ុន កាន់តែស្អិតរមួត ក៏ដូចជាការបង្កើនឱកាសដល់បណ្តាអ្នកវិនិយោគរវាងប្រទេសទាំងពីរឱ្យទទួលបាននូវបទពិសោធន៍ថ្មីៗផងដែរ។
ជាមួយគ្នានេះ លោកក៏បានជំរុញឱ្យមានក្រុមហ៊ុនជប៉ុនចូលមកវិនិយោគនៅកម្ពុជាឱ្យតែច្រើនបន្ថែមទៀត៕
