ដោយ នៅ ស៊ីវុត្ថា
ភ្នំពេញ៖ មន្ត្រីជាន់ខ្ពស់នៃរាជរដ្ឋាភិបាលកម្ពុជា បានឲ្យដឹងថា រាជធានីភ្នំពេញនាពេលបច្ចុប្បន្ននេះ បាននឹងកំពុងតែរីកលូតលាស់ក្លាយទៅជាមជ្ឈមណ្ឌលពាណិជ្ជកម្មមួយដ៏ទាក់ទាញ និងរស់រវើកដែលមានសកម្មភាពអាជីវកម្មមមានញឹក មានហាងលក់ទំនិញ និងសំណង់ធំៗ ជាពិសេសអគារខ្ពស់ៗជាច្រើនកំពុងតែសាងសង់ និងរីកដុះដាលដូច ផ្សិតបម្រើដល់ការរកស៊ី ស្នាក់នៅ និងធ្វើការងារប្រកបដោយផាសុខភាព។
លោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា និងព្រឹទ្ធសភាកម្មវិធីសម្ភោធ ពិពរណ៍ពាណិជ្ជកម្ម ខេត្តឡាវនិញ-កម្ពុជា នៅថ្ងៃទី២៦ ខែមេសា ឆ្នាំ២០១៩បានឲ្យដឹងថា កម្ពុជាកំពុងតែក្លាយជាគោលដៅថ្មីមួយគួរឲ្យចាប់អារម្មណ៍បំផុត ពីអ្នកវិនិយោគក្នុងស្រុក និងបរទេស ដោយសាររាជរដ្ឋាភិបាលមានគោលនយោបាយ ចាត់ទុកវិស័យឯកជន ជាក្បាលម៉ាស៊ីនរុញកំណើនសេដ្ឋកិច្ច និងការស្វាគមន៍យ៉ាងកក់ក្តៅ ដល់អ្នកវិនិយោគបរទេសដោយគ្មានប្រកាន់ជាតិសាសន៍ និងកត្តាអំណោយផលផ្សេងទៀត រួមទាំងការលូតលាស់ផ្នែកសេដ្ឋកិច្ចយ៉ាងលឿន ជាពិសេសខាងពាណិជ្ជកម្ម សំណង់ ទេសចរណ៍ ហិរញ្ញវត្ថុ ទីផ្សារពលករមានតម្លៃទាប និងច្បាប់វិនិយោគដែលអនុគ្រោះដល់ធុរកិច្ចជន ។
លោកស្រីបន្តថា ដោយឡែក ចំណងសាមគ្គីភាព មិត្តភាព និងសហប្រតិបត្តិការរវាងចិន និងកម្ពុជា កាន់តែមានការរីកចំរើនលើគ្រប់វិស័យ។ ចិន ជាប្រទេសដែលបានផ្តល់ជំនួយឥតសំណង និងផ្តល់ឥណទានអនុគ្រោះច្រើនជាងគេដល់កម្ពុជា ជាប្រភពវិនិយោគទុនធំបំផុត និងជាទីផ្សារទេសចរណ៍ធំបំផុតរបស់កម្ពុជា។
ស្របពេលប្រទេសចិនមានគំរោងដ៏ធំមួយគឺ «គំនិតផ្តួចផ្តើមខ្សែក្រវ៉ាត់ និងផ្លូវ» ដែលកំពុងដំណើរការ និងបានទាក់ទាញការចូលរួមយ៉ាងសកម្មពីប្រទេសជាច្រើនក្នុងតំបន់ និងក្រៅតំបន់ រួមទាំងកម្ពុជាផងដែរ ការតាំងពិពរណ៍នេះពិតជាទទួលបានផលប្រយោជន៍ និងជោគជ័យជាមិនខាន។
លោកស្រីក៏បានលើកទឹកចិត្តឱ្យ ក្រុមហ៊ុនមកពីប្រទេសចិន ជាពិសេសខេត្តឡាវនិញ បង្កើនការចូលមកបណ្តាក់ទុន និងធ្វើពាណិជ្ជកម្មនៅកម្ពុជា ថែមទៀត៕
